Футбол бўйича Ўзбекистон U-20 терма жамоаси ўз мезбонлигида ўтаётган Осиё Кубоги—2023 чорак финалида Австралияни мағлуб этиб (1:1, 5:4), Жаҳон чемпионати йўлланмасига эга чиқди.
“Дарё” шу муносабат билан Ўзбекистон ёшлар ва ўсмирлар терма жамоаларининг “кичик мундиал”лардаги иштироки тарихи ҳақида сўз юритади.
Ёшлар ўртасидаги Жаҳон чемпионати — 2003
2003 йилги мусобақа Ўзбекистон ёшлар терма жамоаси учун илк Жаҳон чемпионати бўлганди. 27 ноябрдан 19 декабрга қадар БААда ўтказилган кичик мундиалда Ўзбекистон терма жамоаси Аргентина, Испания, Мали каби терма жамоалар билан биргаликда Б гуруҳидан ўрин олади. Малига қарши биринчи учрашувда Ўзбекистон ёшлари 2:3 ҳисобида мағлубиятга учради. Ислом Иномов ва Александр Гейнрих голлар муаллифига айланди.
Иккинчи турда Аргентина билан баҳс олиб борган Ўзбекистон илк дақиқаларда Александр Гейнрих томонидан урилган гол эвазига ҳисобни очди. Аммо Аргентина 70-дақиқада Леандро Фернандес ва 90+3-дақиқада Фернандо Кавенагининг голлари эвазига 3 очкони илиб кетади. Учинчи турда эса Ўзбекистон Испания ёшлари билан тўқнаш келди. 15-дақиқада Андрес Иньеста томонидан урилган гол ўйинда ягоналигича қолади ва Ўзбекистон учинчи ўйинда ҳам мағлубиятни қабул қилиб олди. Шу тариқа Ўзбекистон ёшлар терма жамоаси учун илк мусобақа омадсиз бошланди.
Ёшлар ўртасидаги Жаҳон чемпионати — 2009
Ўзбекистон ёшлар терма жамоаси 2009 йилги Жаҳон чемпионатида Д гуруҳидан ўрин олади. Рақиблар эса Гана, Уругвай ва Англия каби кучли жамоалар эди. Биринчи турда бўлажак жаҳон чемпиони Ганага қарши майдонга тушган ўзбекистонлик йигитлар 2:1 ҳисобида мағлубиятга учради. Ўзбекистоннинг ягона голига Шерзод Каримов муаллифлик қилди.
Иккинчи турда Уругвай ёш “оқ бўрилар”га ҳеч қандай имконият қолдирмайди ва 3:0 ҳисобида ғалаба қозонди. Охирги турда эса Англияга қарши учрашувда Иван Нагаев 1 очко келтирган гол муаллифига айланди. Дуранг натижа билан Ўзбекистон гуруҳда учинчи ўринни эгаллади ва бу кейинги босқичга чиқиш учун камлик қилди.
Ўсмирлар ўртасидаги Жаҳон чемпионати — 2011
Мексика мезбонлигида ўтган турнирда ўзбекистонлик ўсмирлар АҚШ, Янги Зеландия ва Чехия билан бир гуруҳдан жой олади. Дастлабки турда кутилмаганда Янги Зеландиядан йирик ҳисобдаги мағлубиятни (1:4) қабул қилиб олган Алексей Евстафеев шогирдлари кейинги ўйинларда рақибларини бир хил 2:1 ҳисобида таслим этади ва биринчи ўрин билан нимчорак финалга йўл олади.
1/8 финалда Австралия 4:0 ҳисобида таслим этилади. Ўша мундиал юлдузлари Аббосбек Maxсталиев ва Темур Ҳакимов биттадан тўп киритган, шунингдек, Давлат Ёрбеков ҳам ўз ҳисобига гол ёздириб қўйганди. Ўзбекистон чорак финалда кейинчалик финалга қадар етиб борган Уругвайга енгилади (0:2).
Ўсмирлар ўртасидаги Жаҳон чемпионати — 2013
Дилшод Нуралиев қўл остидаги жамоа мусобақа гуруҳ босқичида Марокаш, Хорватия ва Панамага қарши баҳс олиб боради. Дастлабки турда Шоҳжаҳон Аббосов ва Рустам Ашурматов томонидан урилган голлар Панама устидан ғалабани таъминлайди. Марокаш билан дуранг қайд этилади (0:0). Ҳал қилувчи турда Хорватияга имкон қолдирилмайди (2:0). Нимчорак финалда Ўзбекистон ўсмирлари Гондурасдан аламли мағлубиятни қабул қилиб (0:1), мусобақа билан хайрлашади.
Ёшлар ўртасидаги Жаҳон чемпионати — 2013
Туркия майдонларида ўтган мусобақа ҳозирга қадар Ўзбекистон ёшлар терма жамоаси учун энг яхши Жаҳон чемпионати бўлиб турибди. Ф гуруҳидан ўрин олган Ўзбекистон ёшлари Хорватия, Уругвай ва Янги Зеландия билан баҳс олиб борадиган бўлди. Биринчи турда Янги Зеландия қийинчиликсиз мағлуб этилди (3:0). Ўзбекистоннинг голларига Аббосбек Maxсталиев, Игор Сергеев ва Диёр Туропов муаллифлик қилди. Иккинчи турда Хорватия билан дуранг натижа (1:1) қайд этилади. Марко Ливаянинг голига Сардор Раҳмонов битта гол билан жавоб қайтарди.
Ҳал қилувчи турда эса Уругвай Ўзбекистонни 4:0 ҳисобида мағлубиятга учратади. Ўзбекистон 4 очко билан учинчи ўринни эгаллади ва плей-оффга йўл олди (энг яхши учинчи ўринни эгаллаб). Нимчорак финалда Греция Ўзбекистон ёшларининг рақибига айланди. Аббосбек Maxсталиев, Игор Сергеев ва Сардор Раҳмоновнинг голлари эвазига юнонлар таслим этилди.
Чорак финалда Францияга тўқнаш келган Ўзбекистон 0:4 ҳисобида енгилди ва мусобақани тарк этди. Қайд этиш керак, французлар сафида Алфонс Ареоля, Курт Zuma, Самюуэль Умтити, Люка Дин, Жордан Верету, Пол Погба каби футболчилар бор эди.
Ёшлар ўртасидаги Жаҳон чемпионати — 2015
2015 йилги мундиалда Ўзбекистон терма жамоаси Германия, Гондурас, Фижи терма жамоалари билан Ф гуруҳига тушди. Биринчи турда кутилмаганда Гондурасга 3:4 ҳисобида имконият бой берилди. Ўзбекистон сафида Достонбек Ҳамдамов, Элдор Шомуродов ва Забиҳилло Ўринбоев гол муаллифига айланди. Иккинчи турда эса Германия 3:0 ҳисобида ғалаба қозонди.
Учинчи турда Ўзбекистон Фижига жавобсиз 3 та гол урди. Бу сафар ҳам Элдор Шомуродов ва Забиҳилло Ўринбоев ўз ҳисобига гол ёздириб қўйди. Учинчи гол эса Миржамол Қосимов ҳисобига ёзилди. Шу тариқа гуруҳда 3 та жамоа бир хил 3 очкодан қўлга киритди. Ўзбекистон эса тўплар нисбати бўйича қолган жамоалардан яхшироқ натижа қайд этган ҳолда, иккинчи ўрин билан плей-оффга йўл олди. Плей-оффдаги илк рақиб Австрия терма жамоаси бўлди. Достонбек Ҳамдамовнинг дубли Ўзбекистонни чорак финалга олиб чиқди. Чорак финалда Сенегал жамоаси билан тўқнаш келган ўзбекистонликлар 0:1 ҳисобида мағлуб бўлди ва мусобақани тарк этди.
Ёшлар ўртасидаги Жаҳон чемпионати — 2023
Равшан Ҳайдаров шогирдлари Индонезия майдонларида 20 майдан 11 июнга қадар ўтказиладиган турнирда иштирок этиш ҳуқуқини қўлга киритди. Саккиз йиллик танаффусдан кейин ўзбекистонлик ёшлар халқаро майдонда яна бир бор тарих ёзишга ҳаракат қилиб кўради.
Жаҳон чемпионати йўлланмаси нақд қилинди, эндиги навбат Ўзбекистон мезбонлигида ўтаётган Осиё Кубогига зафар қучишга.
Изоҳ (0)