O‘zbekiston U-20 terma jamoasi bosh murabbiyi Ravshan Haydarov yoshlar o‘rtasidagi Osiyo Kubogi chorak finalidan o‘rin olgan Avstraliyaga qarshi bahs oldidan matbuot anjumanida ishtirok etdi.
Avstraliyaga qarshi o‘yin haqida
Ushbu bosqichga yetib kelgan barcha jamoalarni tabriklayman. Chorak final o‘yinlari barcha uchun muhim hisoblanadi. Bilasiz, bu o‘yin Jahon chempionati yo‘llanmasini ham taqdim etadi. Shu sababli biz mazkur muhim o‘yinda g‘alaba uchun ishtiyoq bilan harakat qilamiz.
Hujumchilar haqida
Bilasiz, futbolda hujum chizig‘i har doim o‘ziga yarasha muammo bo‘lgan. Biroq aytishim kerak, bizda yaxshi darajadagi hujumchilar bor. Xususan, Po‘latxo‘ja ham o‘tgan o‘yinlarda yaxshi tomonlama o‘zini ko‘rsatdi. Unda yetarli tajriba bor.
Avvalgi turnirlarda olingan tajriba va futbolchilarga motivatsiya berish haqida
Men va murabbiylar shtabim bu kabi musobaqalarda avval ham ishtirok etganmiz va tajriba to‘plaganmiz. Bunday musobaqalar, xususan, JCH yosh futbolchilar uchun juda muhim hisoblanadi. Bu futbolchilar bizning kelajagimiz. Aytganimdek, ularning o‘sishlari, faoliyatlarida yirik turnirlar katta ahamiyatga ega. Biz buni futbolchilarga tushuntirib boryapmiz.
Guruh bosqichi va chorak final o‘yinlari haqida
Guruh bosqichida o‘ziga yarasha murakkab o‘yinlarda o‘ynadik. Avstraliyaga qarshi o‘yin esa yangi tarix. Biz bu jamoaga boshqacha yondashuv bilan tayyorgarlik ko‘rmoqdamiz. Mas’uliyat va sovuqqonlik bilan kerakli natija uchun maydonga tushamiz.
Eslatib o‘tamiz, O‘zbekistonning Avstraliyaga qarshi bahsi 11-mart kuni bo‘lib o‘tadi. Mazkur o‘yindagi g‘alaba Jahon chempionatiga yo‘llanmasini taqdi etadi.
Izoh (0)