Замонавий поп мусиқа маликаси, актриса, хайриячи, муваффақиятли ишбилармон аёл ва ниҳоят, ажойиб она — буларнинг барчаси Рианна ҳақида. Яқинда у биринчи фарзандини дунёга келтирганди, ҳозир эса иккинчи фарзандига ҳомиладор.
2023 йил 12 февралда Рианна 5 йил ичида биринчи марта саҳнага чиқди. У Super Bowl’нинг танаффус пайтида чиқиш қилди, у ерда ўзининг энг хит қўшиқларини ижро этди. Томошабинлар дарҳол унинг юмалоқ қорнига эътибор қаратдилар. Улардан баъзилари хонанда биринчи фарзанди туғилгандан кейин қоматини шу тарзда ғурур билан намойиш этяпти, деб ўйлаган, бошқалари эса унинг ҳомиладорлигини тахмин қилган.
Шоудан бир соат ўтиб хонанданинг вакиллари барча мухлисларга хушхабарни етказишди. Мухлисларнинг бир қисми хафа бўлди, чунки бу Рианнанинг узоқ кутилган 9-альбоми номаълум муддатга қолдирилаётганини англатади, бошқалари эса хонанда учун чин дилдан хурсанд бўлди.
Саҳнага чиқишидан бир неча кун олдин Рианна иккинчи фарзандига ҳомиладор эканига ишора қилган, аммо кўпчилик буни шоудан кейин англаб етди. Мухбирнинг шоу давомида томошабинларни кутилмаган ҳодисалар кутяптими, деган саволига у шундай жавоб берганди: “Мен кимнидир олиб келиш ҳақида ўйлаяпман. Ишончим комил эмас, лекин кўрамиз”. Табиийки, мухлислар хонанда ўз вақтида ҳамкорлик қилган кўплаб санъаткорлардан бири ҳақида гапиряпти деб ўйлашган, аммо улар янглишди.
Рианна Super Bowl’да чиқиш қилиш ёки қилмаслиги ҳақида кўп ўйлаб ўтирмаганини айтади: “Она бўлганингизда ўзингизни ҳамма нарсани қила оладигандек ҳис қиласиз. Суперкубок эса мен учун шундай ҳолатлардан бири эди. Ўғлим учун ҳам бу чиқишимни кўриш жуда муҳим эди”. 2022 йил май ойида Рианна севгилиси, реппер А$AP Рокйъдан биринчи фарзандини дунёга келтирди. Аммо у ҳали ҳам боланинг исмини ошкор қилмаган бўлса-да, яқинда уни видеосини кўрсатди, ҳатто у билан бирга Vogue фотосессиясида иштирок этди.
Рианна интервьюларидан бирида чақалоқ табассуми у учун ота-оналикдаги энг яхши нарса эканлигини айтади: “Фарзандим табассум қилганда, ҳамма нарса иккинчи даражага тушади. Бу дунёдаги энг яхши нарса!”. Отаси А$AP Рокйънинг сўзларига кўра, у ҳар сафар Рианна ва ўғлининг олдига келганида худди жаннатга тушиб қолганга ўхшайди.
Рианна ҳомиладорлик пайтида ва ундан кейинги гардероби ҳақида шундай дейди: “Ҳомиладорлигимда кийинишим жуда оддий эди, аммо кейин ҳаммаси ўзгарди. Туғуруқхонадан уйга қайтганимдан кейин бир ҳафта давомида фақат толстовка ва спорт шимларини кийиб юрдим. Аммо бир неча ҳафта ўтгач, нима кийишни билмай қолдим, чунки ҳамма нарса жуда кичик ёки жуда катта эди”.
Машҳур эр-хотиннинг яқинлари Рианна она бўлишни чиндан ҳам яхши кўришини ва у ўғли билан овора эканлигини таъкидлайди. Хонанда бутун вақтини бола билан ўтказишга ҳаракат қилади. Унинг севгилиси ҳам ажойиб ота. Эр-хотин дўстларининг сўзларига кўра, Рианна ҳеч қачон она бўлишни орзу қилмаган, аммо Рокки билан танишиши уни том маънода бунга олиб келган.
Рианна, шунингдек, оналик ҳисси ўзининг онасига бўлган муҳаббатнинг бутунлай янги даражасини очганини айтади. Хонанда онасини кўпроқ қадрлай ва ҳурмат қила бошлади. Постларнинг бирида у онасининг фотосуратини жойлаштириб, шундай деб ёзди: “Бугун маликамнинг туғилган куни! Оналик чўққисида мен онамга бўлган муҳаббат ва ҳурматнинг янги даражаларини кашф қилдим, буни ҳеч қачон тушунтириб бера олмайман! Мен унга ҳар сонияда гул беришни хоҳлайман! Мен сизни яхши кўраман, ойи!”
Севгилиси билан муносабатлари ўзгарган-ўзгармаганлиги ҳақида фикр юритар экан, Рианна шундай дейди: “Бола туғилишидан олдин ҳам биз бир-биримизни жуда яхши тушунганмиз. Мен бир нарсани айта оламан: ота-оналик бизни янада яқинроқ қилди. У ўғлининг отаси билан бўлган муносабатига қойил қолишдан тўхтамайди: “Улар бирга бўлганларида шунчаки четда туриб, уларнинг эркаклар клубига кириш учун навбатимни сабр билан кутаман. Ўғлим отасини жуда яхши кўради. Мен эса ҳайрон бўламан: нима бўляпти, сени мен туғмадимми?”
Худди шу интервьюда журналист Рианнага 2020 йилда қўшиқчи уч ёки ҳатто тўртта фарзанд кўришни хоҳлаётганини айтганини эслатди. Хонанда бунга жавобан: “Йўғ-эй, ростдан ҳам шундай деганманми? Жин урсин, тилимга эҳтиёт бўлишим керак. Аслида мен ҳаммага очиқман. Чиндан ҳам мен кўпроқ фарзанд кўришни хоҳлайман”.
Биринчи фарзанди туғилганидан бир неча ҳафта ўтгач, таниқли жуфтликнинг яқинларидан бири улар иккинчи фарзандли бўлишни хоҳлашаётганини айтди: “Улар катта оилани орзу қилади. Рианна ҳомиладор бўлишни яхши кўради, у ўз қоматини борича қабул қилди”. Шунингдек, у тез орада яна фарзанд кўришса, ҳайрон бўлмаслигини ҳам қўшимча қилган. Бу эса яқин келажакда содир бўлади.
Изоҳ (0)