Ayol kishi uchun eng yaxshi sovg‘a nima? 8-mart kuni bu savol ko‘pchilik erkaklarni o‘ylantirishi aniq. “Daryo” muxbirining bu savoliga o‘zbek san’at vakillari quyidagicha javob berdi.
Zuhra Soliyeva: “Hurmat bilan o‘zim”
Foto: “Daryo”
— Ayoliga “Sen nimani yaxshi ko‘rishingni bilmadim”, deb bahona qiladigan erkaklar ko‘p. Ular uchun eslatma o‘rnida aytib o‘taman. Dunyodagi barcha ayollarga yoqadigan sovg‘a bu atir bilan guldir. Meni qalban tushingan inson juda qimmat atirdan ikkitasini sovg‘a qildi. Undan avval esa sovg‘a olib, “hurmat bilan o‘zim” deb yurardim. Eng muhimi ayol kishini hech qachon e’tiborsiz qoldirmaslik kerak, — deydi aktrisa.
Ahror Usmonov: “Sovg‘a imkoniyatga qarab olinadi”
— Ayol nozik hilqat, unga hamisha shirin so‘z bilan muomala qilish kerak. Erkak uchun ayolni hurmat qilish ham farz, ham qarzdir. Sovg‘a imkoniyatga qarab olinaveradi, muhimi shirinso‘z bo‘lish kerak, — deydi xonanda.
Avaz Oxun: “Ayolning kayfiyati oilaga ta’sir qiladi”
— Ayol kishi uchun eng yoqimli sovg‘a tilla taqinchoq bo‘lsa kerak. Chunki ayollar tillaga ishqiboz bo‘lishadi. Rostini aytsam, biror marta bayramni oila davrasida kutib olmayman. Oilamizda bayram bir-ikki kundan keyin nishonlanadi. Hatto, tug‘ilgan kunimda ham to‘y chiqib qolsa, beraridan qismasin deb to‘yga ketaveraman.
Oilada ayol kishining kayfiyati ham salomatligi ham ko‘p narsalarga ta’sir qiladi. Agar unda mana shu jihatlar yaxshi bo‘lmasa, xonadondan fayz yo‘qoladi, — deydi so‘z ustasi.
Afro‘za: “Eng yaxshi sovg‘a mehr”
— Qiz va ayollar uchun eng yaxshi sovg‘a bu mehr. Sovg‘aning katta-kichikligi bo‘lmaydi. Shaxsan men sovg‘aning narxi emas, e’tibor bilan berilgani quvontiradi. Har bayramda dadam birinchilardan bo‘lib onam va menga sovg‘a beradi. Shaxsan oilamdagi bu an’ana meni juda quvontiradi.
Jenisbek Piyazov: “Gentra olib berdim...”
— Bu yil sovg‘a haqida umuman o‘ylaganim yo‘q. Chunki o‘tgan yil ayolimga uch yilga yetadigan sovg‘a — Gentra avtomobilini sovg‘a qilgandim. Uch yil yetadi deganimning boisi, uni kreditga sotib olganman va har oy pulini to‘layotganimda 8-mart bayramini bir eslab o‘taman. Ayol kishiga sovg‘a berish uchun bayramni kutib o‘tirish shart emas. Yaxshi kayfiyatda, unga biror taom tayyorlab bersangiz ham quvonadi. Muhimi, hammasi e’tibor va cheksiz mehr bilan bo‘lishi kerak, — deydi xonanda.
Malika Egamberdiyeva: “Ayol e’tiborsiz qolmasin”
— Ayol kishi uchun eng qimmatbaho sovg‘a — e’tibor. Ayol e’tiborsiz qoldi degani u yashayapti degani emas. Begonadan olingan sovg‘aning o‘rni boshqa. Ayol birinchi o‘rinda oila a’zosi, xususan turmush o‘rtog‘idan sovg‘a kutadi. Shaxsan men bayramni oila a’zolarim davrasida o‘tkazishni xohlayman, — deydi xonanda.
Boltaboy Toshmatov: “Bayramdan keyin 3 oy gaplashmagan”
— Ayol kishiga sovg‘a olish yarashaveradi. Ularga qancha e’tibor qilsa shuncha kam. Erkakman deb gerdayib yuramiz ammo nomimizning qolishi, bizdan yaxshi zurriyodlarning ko‘payishi ayolga bog‘liq. Erkak ko‘chaning odami. Ayol uyning chirog‘i deb bejiz aytishmaydi.
Bir yil qiziq voqea bo‘ldi. Ayolimga bayramga mashina sovg‘a qilaman dedim. U yettinchi osmonlarga uchib, mendan mashinani kutgan. Men esa so‘zimning ustidan chiqib unga kir yuvadigan mashina sovg‘a qilganman. Hazilimdan arazlab uch oy gaplashmay yurgandi, — deydi so‘z ustasi.
Bahriddin Zuhriddinov: “Umraga yo‘llanma sovg‘a qildim”
— O‘tgan yili onamga Umra safariga yo‘llanma sovg‘a qildim. Bu shu kungacha qilgan eng yaxshi sovg‘alarimdan biri bo‘ldi, deyolaman. Aslida sovg‘aning katta-kichigi bo‘lmaydi, — deydi xonanda.
Mustafo: “Tilla taqinchoqlar ayollarni quvontiradi”
— Har doim onamga eng yaxshi sovg‘alarni berishga harakat qilaman. Nazarimda, ayollarni quvontiradigan sovg‘a bu tilla taqinchoqlar bo‘lsa kerak. Ular chiroyli, qimmatbaho va estalik bo‘loladigan sovg‘a, — deydi xonanda.
Izoh (0)