“Daryo”ga kelib tushgan navbatdagi murojaatda Samarqand viloyatining Nurobod tumanida sanitariya epidemiologik osoyishtalik va jamoat salomatligi bo‘limi xodimlari majburiy mehnatga jalb qilingani xabar berildi. Murojaatdagi videoda oq xalatdagi xodimlar haqiqatdan ham kimningdir xonadoni devorlarini oqlayotgani ko‘ringan. “Daryo” mazkur murojaatga aniqlik kiritish uchun majburiy mehnatga jalb qilingani aytilgan tibbiyot xodimlari va masʼullar bilan suhbatlashdi.
Murojaatchi Gulshoda Ahmedovaning “Daryo”ga bildirishicha, Nurobod tumani sanitariya epidemiologik osoyishtalik va jamoat salomatligi bo‘limi boshlig‘i vazifasini bajaruvchi Farangiz Sulaymonova xodimlariga 3-4 kun muhlat berib, kimningdir xonadonini ohaklab kelish topshirig‘ini bergan.
“Videoda ko‘rgan bo‘lsangiz xodimlar maxsus avtomobilda o‘sha uyga borib, uyni ohaklab kelishgan. Bu holat yakshanba kuni ham bo‘lgan. Bu birinchi holat, bo‘lim boshlig‘i xodimlarini majburlab, ohaklash ishlarini qilasan degan”, — deydi Gulshoda Ahmedova.
Murojaatchining bu iddaosini rad etgan Nurobod tuman sanitariya epidemiologik osoyishtalik va jamoat salomatligi bo‘limi boshlig‘i vazifasini bajaruvchi Farangiz Sulaymonova unga tuhmat qilishayotganini aytmoqda.
“Men bu holat bo‘yicha IIBga ham murojaat qildim. Bu holat Telegram kanallarida noto‘g‘ri talqin etilib, yolg‘on axborot tarqatishmoqda. Aslida ikki nafar xodimim hududda nazorat ishlarini olib borishi uchun yuborilgan. Shunda o‘sha mahallada yashovchi eri Rossiyaga ishlash uchun ketgan homilador ayol xonadoni devorlarini ohaklay olmasligini aytganida, kelinchakka yordam berib savob olishni istagan xodimlarim unga yordam bergan. Men ham xayrli ishga bosh qo‘shib, o‘sha xonadon oqlanishi uchun zarur bo‘lgan ohakni olib berdim. Xodimlarim esa homilador ayolga yordam berib, duo olgan. Bu ishda hech kim ularni majburlamagan. Ular savob uchun shu ishga qo‘l urgan”, — deydi Farangiz Sulaymonova.
Begona xonadonni ohaklash ishlarida qatnashgan tibbiyot xodimi Bahodir Ro‘ziyev ham ular bu ishni savob uchun qilganini, qolaversa o‘sha xonadonda yashovchi ayol tanishining qarindoshi bo‘lgani uchun ham unga yordam berganini aytmoqda.
“O‘sha kuni biz tumanning ‘Tepaqul’ mahallasiga borib, hududda qilinayotgan ohaklash ishlarini nazorat qilishimiz kerak edi. O‘sha xonadonga borganimizda kelinchak eri Rossiyaga ishlashga ketganini, ayni paytda o‘zi homilador ekanini bildirib, uyi devorlarini oqlay olmasligini aytdi. Shunda sherigim va men savob qilish uchun ushbu xonadon devorlarini o‘z xohishimiz bilan oqlab berdik. Lekin buni noto‘g‘ri talqin qilishmoqda. Aslida biz savob olmoqchi edik”, — deydi Bahodir Ro‘ziyev “Daryo” muxbiri bilan suhbatlashar ekan.
Izoh (0)