“Дарё”га келиб тушган навбатдаги мурожаатда Самарқанд вилоятининг Нуробод туманида санитария эпидемиологик осойишталик ва жамоат саломатлиги бўлими ходимлари мажбурий меҳнатга жалб қилингани хабар берилди. Мурожаатдаги видеода оқ халатдаги ходимлар ҳақиқатдан ҳам кимнингдир хонадони деворларини оқлаётгани кўринган. “Дарё” мазкур мурожаатга аниқлик киритиш учун мажбурий меҳнатга жалб қилингани айтилган тиббиёт ходимлари ва масъуллар билан суҳбатлашди.
Мурожаатчи Гулшода Аҳмедованинг “Дарё”га билдиришича, Нуробод тумани санитария эпидемиологик осойишталик ва жамоат саломатлиги бўлими бошлиғи вазифасини бажарувчи Фарангиз Сулаймонова ходимларига 3-4 кун муҳлат бериб, кимнингдир хонадонини оҳаклаб келиш топшириғини берган.
“Видеода кўрган бўлсангиз ходимлар махсус автомобилда ўша уйга бориб, уйни оҳаклаб келишган. Бу ҳолат якшанба куни ҳам бўлган. Бу биринчи ҳолат, бўлим бошлиғи ходимларини мажбурлаб, оҳаклаш ишларини қиласан деган”, — дейди Гулшода Аҳмедова.
Мурожаатчининг бу иддаосини рад этган Нуробод туман санитария эпидемиологик осойишталик ва жамоат саломатлиги бўлими бошлиғи вазифасини бажарувчи Фарангиз Сулаймонова унга туҳмат қилишаётганини айтмоқда.
“Мен бу ҳолат бўйича ИИБга ҳам мурожаат қилдим. Бу ҳолат Telegram каналларида нотўғри талқин этилиб, ёлғон ахборот тарқатишмоқда. Аслида икки нафар ходимим ҳудудда назорат ишларини олиб бориши учун юборилган. Шунда ўша маҳаллада яшовчи эри Россияга ишлаш учун кетган ҳомиладор аёл хонадони деворларини оҳаклай олмаслигини айтганида, келинчакка ёрдам бериб савоб олишни истаган ходимларим унга ёрдам берган. Мен ҳам хайрли ишга бош қўшиб, ўша хонадон оқланиши учун зарур бўлган оҳакни олиб бердим. Ходимларим эса ҳомиладор аёлга ёрдам бериб, дуо олган. Бу ишда ҳеч ким уларни мажбурламаган. Улар савоб учун шу ишга қўл урган”, — дейди Фарангиз Сулаймонова.
Бегона хонадонни оҳаклаш ишларида қатнашган тиббиёт ходими Баҳодир Рўзиев ҳам улар бу ишни савоб учун қилганини, қолаверса ўша хонадонда яшовчи аёл танишининг қариндоши бўлгани учун ҳам унга ёрдам берганини айтмоқда.
“Ўша куни биз туманнинг ‘Тепақул’ маҳалласига бориб, ҳудудда қилинаётган оҳаклаш ишларини назорат қилишимиз керак эди. Ўша хонадонга борганимизда келинчак эри Россияга ишлашга кетганини, айни пайтда ўзи ҳомиладор эканини билдириб, уйи деворларини оқлай олмаслигини айтди. Шунда шеригим ва мен савоб қилиш учун ушбу хонадон деворларини ўз хоҳишимиз билан оқлаб бердик. Лекин буни нотўғри талқин қилишмоқда. Аслида биз савоб олмоқчи эдик”, — дейди Баҳодир Рўзиев “Дарё” мухбири билан суҳбатлашар экан.
Изоҳ (0)