Qirg‘iziston bosh vaziri Akilbek Japarov boshchiligidagi delegatsiya Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Delegatsiya aʼzolarini Namangan viloyati hokimi Shavkat Abdurazzoqov kutib oldi. Mehmonlar To‘raqo‘rg‘on tumanida “Iftixor kiyim sanoati” MCHJ tomonidan barpo etilayotgan ishlab chiqarish kompleksi bilan tanishdi. Viloyat sanoatida yetakchi mavqega ega bo‘lishi kutilayotgan ushbu majmuani tashkil etish uchun 17 gektar maydonda qurilish ishlari olib borilmoqda. Japarov qurilish jarayonlari va bu yerda tayyorlanadigan mahsulotlarni ko‘zdan kechirdi.
Delegatsiya aʼzolari “Fazman tekstil” korxonasi bilan ham tanishtirildi. Yaqinda ochilgan va mingga yaqin yangi ish o‘rinlari yaratilgan korxonada dunyoga mashhur brendlar bilan hamkorlik qilmoqda. Yiliga 1 million dona kostyum-shim ishlab chiqarish quvvatiga ega korxonada yoshlarga ish o‘rgatish uchun o‘quv markazi ham tashkil etilgan.
Qirg‘iz Respublikasi delegatsiyasining navbatdagi manzili “Art soft cluster” xolding kompaniyasi bo‘ldi. Bu yerda 1000 nafar ishchi-xodim mehnat qilmoqda, kompaniya mahsulotlari deyarli to‘liq chet elga yuboriladi.
Akilbek Japarov Namangandagi tekstil sanoatining salohiyatiga yuksak baho berdi. Qirg‘izistondagi turdosh korxonalar bilan yaqin aloqalar o‘rnatish, o‘zaro tajriba almashish bo‘yicha takliflarini bildirdi.
Izoh (0)