O‘zbekiston va Qirg‘iziston o‘zaro tovar ayirboshlash hajmini 2 milliard dollarga yetkazishni rejalashtirmoqda, deb xabar beradi “Dunyo” agentligi.
Qayd etilishicha, ikki mamlakat o‘rtasida diplomatik munosabatlar o‘rnatilganining 30 yilligini nishonlash munosabati bilan O‘zbekiston elchisi Xurshid Mirzohidov Qirg‘iziston Milliy teleradiokompaniyasining “Birinchi radio” radiokanalini “Vektor” dasturiga intervyu bergan. Unda elchi hamkorlikning ustuvor yo‘nalishlarini sanab o‘tgan. Bular:
- yetakchi korxona va bizneslar o‘rtasidagi hamkorlik;
- tranzit salohiyatidan samarali foydalanish va uni oshirish;
- suvdan va energetika sohasidan foydalanishda hamkorlik;
- mintaqalararo hamkorlik;
- ikki mamlakat xalqlarini bir-biriga yaqinlashtirish maqsadida madaniy-gumanitar almashinuvlarni faollashtirish.
Mirzohidovning so‘zlariga ko‘ra, iqtisodiy hamkorlik ikki mamlakat o‘rtasidagi siyosiy, madaniy-gumanitar yo‘nalish bilan bir qatorda O‘zbekiston—Qirg‘iziston munosabatlarining muhim bo‘g‘ini hisoblanadi. Ta’kidlanishicha, mamlakatlar o‘rtasidagi savdo-iqtisodiy aloqalar izchil rivojlanmoqda, tovar ayirboshlash darajasi o‘sish tendensiyasiga ega.
Izoh (0)