Sirdaryo tumanidagi “Qolgansir“ davlat o‘rmon ov xo‘jaligi yer maydonida yong‘in sodir bo‘ldi. Bu haqda Tabiat resurslari vazirligi axborot xizmati xabar berdi.
Ma’lum bo‘lishicha, xo‘jalikning 10 gektar maydonida yong‘in sodir bo‘lgan, shundan 2 gektar yer maydonidagi mavjud manzarali daraxtlar tegishli tartibda xatlovdan o‘tkazilib, jami 4 turdagi 294 dona manzarali daraxtlar o‘sishdan to‘xtash, 4 turdagi 217 dona manzarali daraxtlar esa o‘sishdan to‘xtamaydigan darajada shikastlangani aniqlangan. O‘simlik dunyosiga yetkazilgan zarar hisoblanganda 494 million 940 ming so‘mni tashkil etgan.
Yong‘inning kelib chiqishiga ''Sholikor“ va ''Sindorobod" SIU hududida faoliyat olib boruvchi 35 nafar fermer va dehqon xo‘jaliklari tomonidan sholidan bo‘shagan yer maydonidagi o‘simlik qoldiqlarining yoqib yuborilganligi sabab bo‘lgan va buning natijasida jami 311,7 gektar dala yer maydoni yongan.
Yong‘in oqibatida yerning unumdor qatlamidagi ball boniteti pasayishiga sabab bo‘lgan holatlar bo‘yicha dastlabki hisob-kitoblar qilinib, 295 million 627 ming so‘m zarar miqdori belgilangan. Yuqoridagi holatlar bo‘yicha tegishli tartibda hujjatlar rasmiylashtirilib, huquqni muhofaza qiluvchi organlarga taqdim etilmoqda. Holat yuzasidan qo‘shimcha axborot berilishi ta’kidlangan.
Izoh (0)