O‘zbekiston aholisi ehtiyoji uchun Ukraina kompaniyasi ishlab chiqaradigan yuqori sifatli dorilar yetkaziladi

Ukrainaning yirik farmatsevtika kompaniyasi bilan o‘zaro hamkorlikni kengaytirish masalalari muhokama qilindi, deb xabar bermoqda “Dunyo” AA.

Qayd etilishicha, O‘zbekistonning Kiyevdagi elchixonasi tomonidan farmatsevtika sohasida Ukraina bilan o‘zaro hamkorlikni rivojlantirish maqsadida yirik dori-darmon mahsulotlari ishlab chiqaradigan “Kusum farm” kompaniyasi rahbarlari Radjiv Gupta va Sheyx Imran bilan uchrashuv uyushtirildi.

Suhbat davomida kompaniya rahbariyati bilan O‘zbekistonga qo‘shimcha investisiyalar kiritish hamda barpo etilayotgan zavodda Yevropa standartlarini tatbiq qilish masalalari bilan birga O‘zbekiston aholisi ehtiyoji uchun Ukrainada ishlab chiqarilayotgan yuqori sifatli dori vositalarini yetkazish bilan bog‘liq masalalar atroflicha muhokama qilindi.

“Kusum” kompaniyalar guruhi hozirgi paytda O‘zbekistonga 5 million AQSH dollaridan ziyod miqdorda investitsiya kiritgan bo‘lib, GMP standartlari asosida dori vositalarini ishlab chiqaradigan zavod qurmoqda.

Ukrainaning mazkur kompaniyasi “Kusum” kompaniyalar guruhining tarkibidagi shirkat bo‘lib, u Ukrainaning Sumi viloyatida Yevropa standartlari asosida dori vositalarini ishlab chiqarish bilan shug‘ullanadi.

Ushbu kompaniyalar guruhi Hindistonda uchta, Ukrainada bitta ishlab chiqarish zavodiga hamda ikkita ilmiy-tadqiqot markaziga ega. Unda ikki ming nafardan ziyod yuqori malakali xodimlar faoliyat ko‘rsatadi.