Ўзбекистон ва Туркия ўртасида рейслар сони кўпайтирилиб, янги йўналишда авиқатновлар йўлга қўйилади. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, 7 март куни инвестициялар, саноат ва савдо вазири Лазиз Кудратов Туркиянинг Ўзбекистондаги фавқулодда ва мухтор элчиси Олган Бекар билан учрашди. Мулоқот аввалида Ўзбекистон томони февраль ойида Туркиянинг жануби-шарқий ҳудудларида содир бўлган кучли зилзила оқибатида кўплаб инсонлар ҳалок бўлгани ва инфратузилмага жиддий зарар етказилгани муносабати билан чуқур ҳамдардлик билдирди. Ўз навбатида туркиялик дипломат табиий офат оқибатларини бартараф этишда ёрдам кўрсатиш мақсадида Туркиянинг табиий офатдан жабр кўрган ҳудудларига қутқарувчиларни ва катта ҳажмдаги инсонпарварлик ёрдами юборгани учун Ўзбекистон раҳбариятига алоҳида миннатдорлик билдирди.
Шунингдек, ўзаро савдо ва сармоявий ҳамкорлик ҳажмини ошириш истиқболлари муҳокама қилинди. Ўзбекистон билан Туркия ўртасидаги ўзаро товар айирбошлаш кўрсаткичлари сўнгги уч йилда бир ярим баробар, инвестициялар ҳажми эса икки баробар ошгани таъкидланди. Томонлар ана шундай ижобий динамикани сақлаб қолиш мақсадида фаол ҳамкорликни давом эттириш ниятида эканликларини тасдиқлади.
Ўзбекистон ва Туркия ўртасидаги транспорт ва логистика соҳасидаги алоқаларни кенгайтириш ва йўлакларни диверсификация қилиш интенсивлигига юқори баҳо берилди. Шу нуқтаи назардан, 2023- йилда икки мамлакат ҳудудлари ўртасида рейслар сонини кўпайтириш ва янги йўналишлардаги авиақатновларни йўлга қўйиш бўйича аниқ чора-тадбирлар келишиб олинди.
Бундан ташқари, томонлар 2023 йилнинг иккинчи ярмида Савдо-иқтисодий ҳамкорлик бўйича Ўзбекистон-Туркия Ҳукуматлараро комиссиясининг навбатдаги йиғилишини ўтказишнинг ташкилий масалаларини кўриб чиқди. Бўлажак тадбир кун тартибини истиқболли шартнома ва келишувлар билан бойитиш учун тегишли вазирлик ва идораларнинг ўзаро ҳамкорлигини фаоллаштириш бўйича келишувга эришилди.
Изоҳ (0)