Belarus muxolifati yetakchisi, respublika prezidentligiga sobiq nomzod Svetlana Tixanovskaya sirtdan 15 yillik qamoq jazosiga hukm qilindi. Bu haqda “BelTA” xabar berdi.
“Minsk shahar sudi Svetlana Tixanovskayani 15 yilga ozodlikdan mahrum qildi. Tixanovskaya sud qarori bilan jazoni umumiy rejimli koloniyada o‘tashi kerak”, — deyiladi xabarda.
Ta’kidlanishicha, Belarusning sobiq madaniyat vaziri va Muvofiqlashtiruvchi kengash prezidiumining a’zosi Pavel Latushko 18 yilga ozodlikdan mahrum etilgan. Sudlanuvchilar davlat hokimiyatini konstitutsiyaga zid tarzda egallab olish, ekstremistik tuzilma yaratish va mamlakat milliy xavfsizligiga zarar yetkazishga qaratilgan boshqa harakatlarda aybdor deb topilgan.
Svetlana Tixanovskaya kim?
Tixanovskaya belaruslik siyosatchi bo‘lib, 37 yoshida 2020-yilgi Belarus prezidentligiga nomzodini qo‘ygan. Saylovda Svetlana Tixanovskaya uchun 10,12 foiz ovoz olgan. Belarusdagi saylovlardan keyin norozilik namoyishlari boshlangan va Svetlana Litvaga jo‘nab ketgan.
Belarus KGB Tixanovskayani terrorizmga aloqador shaxslar ro‘yxatiga kiritgan. Belarus hukumati Svetlana Tixanovskayani ekstraditsiya qilish so‘rovi bilan Litvaga murojaat qilgan, so‘rov rad etilgan. 2021-yil 14-dekabr kuni Svetlana Tixanovskayaning turmush o‘rtog‘i 2020-yilgi prezidentlik saylovlariga tayyorgarlik ko‘rish va o‘tkazish vaqtida ommaviy tartibsizliklar uyushtirganlikda aybdor deb topilib,18 yilga ozodlikdan mahrum etilgan. 2022-yil iyun oyida u terrorizmga aloqador shaxslar ro‘yxatiga kiritilgan.
2022-yil oktabr oyida Tixanovskaya Belarus muxolifatining boshqa yetakchilari qatorida Yevroparlamentning Andrey Saxarov nomidagi “Fikr erkinligi uchun” nomidagi mukofoti laureati deb e’lon qilindi. 2021-yil 30-yanvarda Litva prezidenti Gitanas Nauseda Tixanovskayani tinchlik bo‘yicha Nobel mukofotiga nomzod qilib ko‘rsatdi. Tixanovskayaning ikki farzandi: o‘g‘li (2010-yilda tug‘ilgan) va qizi (2015-yilda tug‘ilgan) bor.
Izoh (0)