Toshkent Ichki Ishlar bosh boshqarmasi 3-mart kuni ota-onalarni “Ryodan” yoshlar harakatidan ogohlantirib, farzandlarining hayotiga, ularda kechayotgan o‘zgarishlarga befarq bo‘lmaslikka chaqirdi. 5-mart kuni esa Toshkentda “Ryodan” harakatiga aloqadorlikda gumonlangan 50 ga yaqin o‘smir ushlanib, profilaktik suhbat o‘tkazilganidan so‘ng qo‘yib yuborildi. “Ryodan” aslida qanday harakat va u haqida nimalar ma’lum?
“Ryodan” yoshlar submadaniyati bo‘lib, uning ishtirokchilari manga va anime (yapon komikslari va multfilmlari) “Hunter x Hunter”dan ilhomlangan. Ushbu guruhdagi o‘smirlar uzun qora soch va katakli shim bilan ajralib turadi. Shuningdek, ularning kiyimlarida “4” raqami tushirilgan o‘rgimchak rasmi ham tasvirlangan. Anime va mangada “Geney Ryodan” yoki “O‘rgimchaklar” deb nomlangan jinoiy to‘da mavjud va o‘rgimchak ularning ramzi hisoblanadi.
Dastlab “Ryodan” harakati internetdagi bir nechta virtual jamoalardan tashkil topgan. Ular anime muxlislari bo‘lib, jamoada Yaponiya animelarini muhokama qilgan. Biroq ayni paytda “Ryodan” harakati turli darajadagi tan jarohati yetkazish, birovning mulkiga zarar yetkazishni ko‘zlagan.
“Ryodan” harakati asosan o‘smirlardan iborat bo‘lib, ularning eng kichigi 15 yoshda. Rossiyada “Ryodan” submadaniyati “VKontankte” ijtimoiy tarmoqda ham bir nechta jamoalarga ega. Ularning eng kattasi 193 mingga yaqin obunachiga ega.
“Ryodan” harakati ishtirokchilari o‘z nishonlarini aniqlab, savdo markazlarida ommaviy mushtlashuvlar, tartibsizliklar uyushtiradi. Rossiyada so‘nggi kunlarda ommaviy mushtlashuvlarda qatnashgani uchun 450 ga yaqin o‘smir, Belarusda esa kamida 200 kishi hibsga olingan. Ushbu submadaniyat vakillari bilan Qozog‘istonda va Ukrainada ham profilaktika ishlari amalga oshirilgan.
Toshkent shahar Ichki ishlar bosh boshqarmasi ham farzandlarga e’tiborli bo‘lishga, ularning submadaniy qiziqishlariga befarq bo‘lmaslikka chaqirgan.
“Bolalarning anime va mangaga bo‘lgan qiziqishini qoralab bo‘lmaydi. Lekin bu qiziqishi tufayli u noma’lum shaxslarning ta’siriga tushib qolmayotganligiga, virtual dunyoni haqiqatdan ajrata olish qobiliyatini yo‘qotmaganligiga ishonch hosil qiling”, — deyiladi ogohlantirishda.
Izoh (0)