Shavkat Mirziyoyev va Qosim-Jo‘mart To‘qayev 3-mart kuni Chimkent shahrida norasmiy uchrashuv o‘tkazdi. Qozog‘iston Tashqi ishlar vazirligi rasmiysi Aybek Smadiyarov nima uchun uchrashuv Chimkentda tashkillashtirilganiga tushuntirish berdi. Bu haqda Nur.kz xabar berdi.
.jpg)
Smadiyarovning so‘zlariga ko‘ra, O‘zbekiston Qozog‘istonning eng yaqin hamkorlaridan biri hisoblanadi.
“Davlat rahbarlari Chimkentda uchrashishga qaror qildi, chunki u bir million aholiga ega yirik shahar va O‘zbekiston bilan chegarada joylashgan. Biz bu yo‘nalishdagi savdo-sotiqni, tranzit salohiyatini, madaniy aloqalarni faol rivojlantirmoqdamiz. Shuning uchun Qozog‘istonning boshqa shaharlarida emas, balki Chimkentda bo‘lishi mantiqan to‘g‘ri”, — dedi u.
Uning ta’kidlashicha, ushbu uchrashuvga oid barcha ma’lumotlar prezident matbuot xizmati tomonidan tarqatilgan.
“Markaziy Osiyo davlatlari rahbarlari istalgan vaqtda uchrashib, ayrim masalalarni qo‘shnichilik, qardoshlik ruhida muhokama qilishi mumkinligidan juda xursandman”, — deya qo‘shimcha qildi Aybek Smadiyarov.
Eslatib o‘tamiz, 3-mart Qozog‘iston va O‘zbekiston prezidentlari Chimkentda norasmiy uchrashuv o‘tkazgan. Suhbatda O‘zbekiston va Qozog‘iston o‘rtasidagi strategik sheriklik va ittifoqchilik munosabatlarini yanada mustahkamlash, o‘zaro manfaatli hamkorlikni kengaytirish masalalari muhokama qilingan. Oliy darajada erishilgan kelishuvlarga muvofiq kooperatsiya loyihalarini jadallashtirish masalalariga alohida e’tibor qaratilgan. Davlat rahbarlari ikki mamlakat bosh vazirlari o‘rinbosarlari, maxsus ishchi guruhlar hamraislarining imzolangan bitimlar va qabul qilingan qarorlar ijrosining borishi to‘g‘risida hisobotlarini tinglagan.
Izoh (0)