Беларусь мухолифати етакчиси, республика президентлигига собиқ номзод Светлана Тихановская сиртдан 15 йиллик қамоқ жазосига ҳукм қилинди. Бу ҳақда “БелТА” хабар берди.
“Минск шаҳар суди Светлана Тихановскаяни 15 йилга озодликдан маҳрум қилди. Тихановская суд қарори билан жазони умумий режимли колонияда ўташи керак”, — дейилади хабарда.
Таъкидланишича, Беларуснинг собиқ маданият вазири ва Мувофиқлаштирувчи кенгаш президиумининг аъзоси Павел Латушко 18 йилга озодликдан маҳрум этилган. Судланувчилар давлат ҳокимиятини конституцияга зид тарзда эгаллаб олиш, экстремистик тузилма яратиш ва мамлакат миллий хавфсизлигига зарар етказишга қаратилган бошқа ҳаракатларда айбдор деб топилган.
Светлана Тихановская ким?
Тихановская беларуслик сиёсатчи бўлиб, 37 ёшида 2020 йилги Беларусь президентлигига номзодини қўйган. Сайловда Светлана Тихановская учун 10,12 фоиз овоз олган. Беларусдаги сайловлардан кейин норозилик намойишлари бошланган ва Светлана Литвага жўнаб кетган.
Беларусь КГБ Тихановскаяни терроризмга алоқадор шахслар рўйхатига киритган. Беларусь ҳукумати Светлана Тихановскаяни экстрадиция қилиш сўрови билан Литвага мурожаат қилган, сўров рад этилган. 2021 йил 14 декабрь куни Светлана Тихановскаянинг турмуш ўртоғи 2020 йилги президентлик сайловларига тайёргарлик кўриш ва ўтказиш вақтида оммавий тартибсизликлар уюштирганликда айбдор деб топилиб,18 йилга озодликдан маҳрум этилган. 2022 йил июнь ойида у терроризмга алоқадор шахслар рўйхатига киритилган.
2022 йил октябрь ойида Тихановская Беларусь мухолифатининг бошқа етакчилари қаторида Европарламентнинг Андрей Сахаров номидаги “Фикр эркинлиги учун” номидаги мукофоти лауреати деб эълон қилинди. 2021 йил 30 январда Литва президенти Гитанас Науседа Тихановскаяни тинчлик бўйича Нобел мукофотига номзод қилиб кўрсатди. Тихановскаянинг икки фарзанди: ўғли (2010 йилда туғилган) ва қизи (2015 йилда туғилган) бор.
Изоҳ (0)