Toshkent viloyatida o‘zganing Spark’ini olib qochgan 6 yigit qo‘lga olindi

Toshkent viloyatining Olmaliq shahrida o‘zganing Spark avtomobilini olib qochishda gumonlangan 6 nafar yigit qo‘lga olindi. Bu haqda “Zamon” informatsion dasturida ma’lum qilindi.

Qayd etilishicha, 27-fevral kuni soat 18:30 larda Olmaliq shahar IIBga Ohangaron tumanida yashovchi 1986-yilda tug‘ilgan fuqaro qo‘ng‘iroq qilib, o‘ziga tegishli Spark avtomobilini noma’lum shaxslar ish joyi oldidagi avtoturargohdan olib qochganini bildirgan.

Ushbu avtotransport vositasini qidirib topish bo‘yicha joylarda fuqarolar bilan tezkor harakatlar olib borilgan. Yaqin hududlarda joylashgan obyektlardagi kuzatuv kameralari o‘rganilib, Spark’ning harakatlanish yo‘nalishi aniqlangan. Surishtiruv ishlari davomida shahar ichidan, ko‘p qavatli uylar oldidan topilgan.

Yo‘l harakati xavfsizligi Jinoyat qidiruv va Post-patrul xizmati xodimlari o‘zaro hamkorlikda ish ko‘rishi natijasida jinoyat ishi doirasida 1999—2004-yillar oralig‘ida tug‘ilgan olti nafar yigit qo‘lga olingan.

Gumonlanuvchilardan birining so‘zlariga ko‘ra, u bundan tashqari 3 ta Damas’ning orqa oynalarini sindirib, ularning ichidagi qimmatbaho buyumlarni o‘zlashtirgan.

Holat yuzasidan Olmaliq shahar IIB Tergov bo‘limi tomonidan dastlabki tergov harakatlari olib borilmoqda.