АҚШ армиясининг собиқ аскари, 24 ёшли Эрик Мелцер “Тўққиз бурчакли орден” неонацист гуруҳига махфий маълумотларни узатгани сабабли террорчиларни қўллаб-қувватлаш ва АҚШ ҳарбий хизматчиларига суиқасд уюштиришда айбланиб, 45 йиллик қамоқ жазосига ҳукм қилинди. Бу ҳақда NBC хабар бермоқда.
“Мелцер ўзининг қаердалиги, нечи киши экани ва қуроллари ҳақидаги маълумотларни бир гуруҳ неонацистларга, анархистларга ва оқларни устун деб билувчиларга ноқонуний равишда ошкор қилиб, ўз бўлинмасига қарши ҳалокатли пистирма уюштиришга уринган”, — деди прокурор Одри Штраус.
Мелцернинг адвокати Жонатан Марвинни ҳукм жуда оғир эканини айтмоқда. “У жазога лойиқ, лекин у ҳаётда яхшилик қила олишини исботлаш имкониятига ҳам лойиқ. Бугунги ҳукм уни бу имкониятдан маҳрум қилди”, — деди ҳимоя томони. Прокурорнинг сўзларига кўра, Мелцер 2017 йилдан буён “Орден” билан алоқадор бўлган, армияга эса 2018 йилда оккултистларга (оккултизм хурофотларга ишонтирувчи мистик таълимот) ёрдам бериш учун қўшилган.
2020 йилда Мелцер ўз бўлинмаси хориждаги махфий ҳарбий объектни қўриқлашда ёрдамлашиши ҳақида билгач, у жойлашув маълумотларини гуруҳга етказган. Ўз навбатида, оккултистлар бўлинмага ҳужум қилиш имкониятини максимал даражада ошириш учун бу маълумотларни “Ал-Қоида” аъзосига топширган. “Айбланувчи Қўшма Штатларни узоқ давом этадиган қуролли тўқнашувга тортишни ўйлаган, бу эса имкон қадар кўпроқ аскарнинг ўлимига олиб келиши мумкин эди”, — деди Адлия вазирлиги.
“Тўққиз бурчакли орден” — Буюк Британияда жойлашган оккултизм ва ёвузлик гуруҳидир, дунёнинг бошқа қисмларида ҳам унинг шўба корхоналари мавжуд. Гуруҳ 1960 йилларда яратилган, аммо 1980 йилларда машҳурликка эришиб, неонацистлар мафкураси билан эътиборни тортди. Хусусан, гуруҳ ўз аъзоларидан жиноят содир этишни талаб қилади.
Изоҳ (0)