Davlat xavfsizlik xizmati korrupsiya va firibgarlik bilan shug‘ullangan mansabdorlarni qo‘lga oldi, deb xabar beradi O‘zA.
Ma’lum qilinishicha, DXXning Toshkent shahri bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan tezkor tadbir o‘tkazilgan. Tadbir davomida Samarqand davlat veterinariya meditsinasi, chorvachilik va biotexnologiyalar universitetining Toshkent filiali mansabdor shaxsi fuqaroni bo‘lim boshlig‘i lavozimiga qabul qilish va ilmiy ishini himoya qilishida yordam berish evaziga 10 ming dollar olgan vaqtida ushlangan.
Shuningdek, Farg‘onada O‘zbekiston tumani tibbiyot birlashmasining reanimatsiya bo‘limi mansabdor shaxsi fuqaroning ishonchiga kirib, unga nisbatan Toshkent shahar Uchtepa tumani IIO FMB Tergov bo‘limi tomonidan qo‘zg‘atilgan jinoyat ishini tanishlari orqali uning foydasiga hal qilib berish evaziga 10 ming dollar olgan vaqtida qo‘lga olingan.
Bundan tashqari, Namangan viloyati Uychi tumani hokimligi yuristkonsulti firibgarlik yo‘li bilan mahalliy fermer xo‘jalik rahbaridan 5 ming dollar olgan vaqtida ushlangan.
Izoh (0)