Andijon viloyati Marhamat tumanida yashovchi fuqaro Nurmuhammad To‘ychiyev 19 yildan buyon, shaxsini tasdiqlovchi hujjatlarsiz, xolasi qo‘ygan ism bilan yashab kelgan. Bu haqda Marhamat tumani hokimligi axborot xizmati xabar bermoqda.
Aytilishicha, Nurmuhammad To‘ychiyev 2003-yil 10-avgust kuni tug‘ilgan, lekin baʼzi sabablarga ko‘ra, shaxsini tasdiqlovchi hujjat berilmagan. U xolasi qaramog‘ida yashab kelgan.
Nurmuhammad To‘ychiyevning xolasi jiyaniga shaxsini tasdiqlovchi hujjat olish maqsadida mutasaddi tashkilotlarga, fuqarolik ishlari bo‘yicha sudga ko‘p marotaba murojaat qilgan bo‘lsa-da, tug‘ilganlik haqida guvohnoma rasmiylashtirolmagan. Mutasaddilardan doim bir xil javob kelgan — bolaning ota-onasi yo‘qligi, onasini vafot etgani va yana boshqa vajlar bilan shikoyat qondirilmay kelgan.
Mazkur masala yuzasidan fuqaro Marhamat tumani hokimligiga murojaat qilgan va ularning ko‘magida masala Fuqarolik ishlari bo‘yicha Asaka tumanlararo sudida ko‘rib chiqilib, Nurmuhammad To‘ychiyev manfaati qondirilishi bo‘yicha qaror chiqargan. Unga ko‘ra Nurmuhammad To‘ychiyev 20 yildan so‘ng tug‘ilganlik to‘g‘risida guvohnomani olgan.
Izoh (0)