DXX Andijonda fuqaroga kredit ajratib berish uchun qariyb 18 ming dollar olgan xodim ushlandi

Davlat xavfsizlik xizmati respublika bo‘yicha bir qator korrupsion holatlarga chek qo‘ydi. Bu haqda DXX axborot xizmati xabar qildi.

Qayd etilishicha, Andijon viloyatidagi injiniring kompaniya xodimi ushbu kompaniya buyurtmachiligi asosida davlat dasturi doirasida kam ta’minlangan oilalar uchun qurilgan ko‘p qavatli arzon uy-joylardan 2 ta xonadonni mahalliy fuqaro nomiga rasmiylashtirib, ushbu xonadonlar uchun bankdan imtiyozli kredit ajratilishida yordam berish evaziga 17800 dollar olgan vaqtida ushlangan.

Toshkent viloyatida qayd etilgan holatda Olmaliq shahar adliya bo‘limi xodimi mahalliy fuqaroni Olmaliq kon metallurgiya kombinatiga ishga kirishida yordam berish evaziga 4000 dollar olgan vaqtida qo‘lga olingan.

Shuningdek, ushbu noqonuniy ishga aloqador bo‘lgan Olmaliq shahridagi maktabgacha ta’lim tashkiloti mudirasi ham ushlangan.

Samarqand viloyati Ishtixon tumani irrigatsiya bo‘limining mansabdor xodimi esa mahalliy fermer xo‘jalik rahbariga xo‘jalikning o‘z hisobidan joriy etilgan tomchilatib sug‘orish texnologiyasi uchun sarflangan mablag‘larning bir qismi davlat tomonidan qoplanishini ma’lum qilib, unga 360 million so‘m miqdorida subsidiya mablag‘i ajratilishida yordam berish evaziga 3500 dollar olgan vaqtida ushlangan.

Hozirda barcha holatlar yuzasidan jinoyat ishlari qo‘zg‘atilgan. Hozirda tergov harakatlari olib borilmoqda.