Давлат хавфсизлик хизмати коррупция ва фирибгарлик билан шуғулланган мансабдорларни қўлга олди, деб хабар беради ЎзА.
Маълум қилинишича, ДХХнинг Тошкент шаҳри бўйича бошқармаси ҳамда Иқтисодий жиноятларга қарши курашиш департаменти ходимлари томонидан тезкор тадбир ўтказилган. Тадбир давомида Самарқанд давлат ветеринария медицинаси, чорвачилик ва биотехнологиялар университетининг Тошкент филиали мансабдор шахси фуқарони бўлим бошлиғи лавозимига қабул қилиш ва илмий ишини ҳимоя қилишида ёрдам бериш эвазига 10 минг доллар олган вақтида ушланган.
Шунингдек, Фарғонада Ўзбекистон тумани тиббиёт бирлашмасининг реанимация бўлими мансабдор шахси фуқаронинг ишончига кириб, унга нисбатан Тошкент шаҳар Учтепа тумани ИИО ФМБ Тергов бўлими томонидан қўзғатилган жиноят ишини танишлари орқали унинг фойдасига ҳал қилиб бериш эвазига 10 минг доллар олган вақтида қўлга олинган.
Бундан ташқари, Наманган вилояти Уйчи тумани ҳокимлиги юристконсулти фирибгарлик йўли билан маҳаллий фермер хўжалик раҳбаридан 5 минг доллар олган вақтида ушланган.
Изоҳ (0)