Shavkat Mirziyoyev Qo‘shilmaslik harakatining maxsus monitoring va ilmiy tadqiqot tarmog‘ini tashkil qilishni taklif qildi. Bu haqda Prezident matbuot xizmati xabar berdi.
Davlat rahbari 2-mart kuni Ozarbayjon poytaxtida bo‘lib o‘tgan Qo‘shilmaslik harakati sammitida so‘nggi yillarda insoniyat pandemiyaga qarshi kurashish bilan bir qatorda, iqlim o‘zgarishi, tabiiy ofatlar va texnogen fojialarning ayanchli oqibatlarini ham o‘z boshidan o‘tkazayotganini qayd etib, bu muammolarning ko‘lami tobora kengayib, ular nafaqat ayrim davlatlar, balki butun bir mintaqalarning xavfsizligi va barqaror taraqqiyoti uchun jiddiy xavf solayotganini ta’kidladi.
Shavkat Mirziyoyev favqulodda holatlar sabablarini chuqur o‘rganish hamda ofat oqibatlarini samarali bartaraf etish maqsadida Qo‘shilmaslik harakatining maxsus monitoring va ilmiy tadqiqot tarmog‘ini tashkil qilishni taklif etdi va vu institutni O‘zbekistonda joylashtirishga tayyorligini bildirdi.
“Albatta, bunday qiyin va murakkab sinovlarni faqatgina birgalikda, bir-birimizni yaqindan qo‘llab-quvvatlagan holda yenga olamiz. Shu maʼnoda, O‘zbekiston 2030-yilga qadar mo‘ljallangan Senday hadli dasturining asosiy maqsadlariga erishish bo‘yicha global platforma faoliyatini yanada kuchaytirish tarafdoridir”, — dedi prezident.
Eslatib o‘tamiz, Shavkat Mirziyoyev Ozarbayjon prezidenti Ilhom Aliyev taklifiga binoan 1-mart kuni amaliy tashrif bilan Boku shahriga borgandi. Shu kuni ikki davlat rahbari dolzarb xalqaro va mintaqaviy masalalarni muhokama qilib, bo‘lajak tadbirlar rejasini ko‘rib chiqdi.
Izoh (0)