O‘zbekiston boks federatsiyasi turli mamlakatlarning Toshkentda o‘tadigan JCH—2023 ni boykot qilayotgani haqida tarqalayotgan xabarlar yuzasidan munosabat bildirdi

O‘zbekiston boks federatsiyasi turli mamlakatlarning O‘zbekistonda o‘tadigan boks bo‘yicha Jahon chempionatiga boykot e’lon qilayotgani haqida tarqalayotgan xabarlar yuzasidan rasmiy munosabat berdi.

Bayonotda O‘zbekiston tomoni musobaqada ishtirok etish uchun ro‘yxatdan o‘tgan mamlakatlarning qatnashish yoki qatnashmasligini belgilash vakolatiga ega emasligi qayd etilgan.

“Bugungi kunda dunyoda hukm surayotgan siyosiy vaziyat sabab ayrim internet manbalari va ijtimoiy tarmoqlarda  joriy yilning 30-aprel — 14-may kunlari Toshkentda bo‘lib o‘tadigan boks bo‘yicha Jahon chempionati haqida noxolis xabarlar tarqalmoqda. O‘zbekiston boks federatsiyasi shu o‘rinda vaziyatga oydinlik kiritib o‘tadi.

Har ikki yilda bir marta o‘tkaziladigan kattalar o‘rtasidagi Jahon chempionati Xalqaro boks assotsiatsiyasi (IBA) tomonidan tashkil etiladi. O‘zbekiston tomoni musobaqada ishtirok etish uchun ro‘yxatdan o‘tgan mamlakatlarning qatnashish yoki qatnashmasligini belgilash vakolatiga ega emas. O‘zbekiston musobaqani o‘tkazuvchi davlat hisoblanadi va tashkiliy masalalar bilan shug‘ullanadi”, — deyiladi bayonotda.

Shuningdek, Boks federatsiyasi bayonotida O‘zbekiston xalqaro sport normalariga rioya qiluvchi davlat ekani va sport siyosatdan holi tamoyilini qo‘llab-quvvatlashi ta’kidlab o‘tilgan.

“Chempionat qatnashchilari, terma jamoalar, sportchi va murabbiylar, hakamlarni ro‘yxatdan o‘tkazish IBA tomonidan amalga oshiriladi. Mamlakatimiz musobaqani qabul qilish huquqini qo‘lga kiritgan vaqtda terma jamoalar yoki sportchilarning xalqaro turnirlardagi ishtiroki bo‘yicha bugungi cheklovlar yo‘q edi.

O‘zbekiston xalqaro sport normalariga rioya qiluvchi davlat bo‘lib, sport siyosatdan holi tamoyilini qo‘llab-quvvatlaydi”.

AQSH, Shvetsiya, Irlandiya, Chexiya va Kanada boks federatsiyalari Hindiston (ayollar o‘rtasida) va O‘zbekistonda (erkaklar o‘rtasida) bo‘lib o‘tadigan boks bo‘yicha Jahon Chempionatiga boykot e’lon qilgani xabar qilingandi. Keyinchalik Ukraina va Norvegiya ham ularga qo‘shilgan. Bunga sabab sifatida federatsiyalar Rossiya va Belarus bokschilariga musobaqalarda o‘z bayrog‘i ostida harakat qilishga ruxsat berilganini qayd etgandi.

IBA boks bo‘yicha Jahon Chempionati boykot qilgan federatsiyalar rahbarlariga nisbatan intizomiy ish ochgani avvalroq ma’lum bo‘lgandi.