Ўзбекистон бокс федерацияси турли мамлакатларнинг Ўзбекистонда ўтадиган бокс бўйича Жаҳон чемпионатига бойкот эълон қилаётгани ҳақида тарқалаётган хабарлар юзасидан расмий муносабат берди.
Баёнотда Ўзбекистон томони мусобақада иштирок этиш учун рўйхатдан ўтган мамлакатларнинг қатнашиш ёки қатнашмаслигини белгилаш ваколатига эга эмаслиги қайд этилган.
“Бугунги кунда дунёда ҳукм сураётган сиёсий вазият сабаб айрим интернет манбалари ва ижтимоий тармоқларда жорий йилнинг 30 апрель — 14 май кунлари Тошкентда бўлиб ўтадиган бокс бўйича Жаҳон чемпионати ҳақида нохолис хабарлар тарқалмоқда. Ўзбекистон бокс федерацияси шу ўринда вазиятга ойдинлик киритиб ўтади.
Ҳар икки йилда бир марта ўтказиладиган катталар ўртасидаги Жаҳон чемпионати Халқаро бокс ассоциацияси (IBА) томонидан ташкил этилади. Ўзбекистон томони мусобақада иштирок этиш учун рўйхатдан ўтган мамлакатларнинг қатнашиш ёки қатнашмаслигини белгилаш ваколатига эга эмас. Ўзбекистон мусобақани ўтказувчи давлат ҳисобланади ва ташкилий масалалар билан шуғулланади”, — дейилади баёнотда.
Шунингдек, Бокс федерацияси баёнотида Ўзбекистон халқаро спорт нормаларига риоя қилувчи давлат экани ва спорт сиёсатдан ҳоли тамойилини қўллаб-қувватлаши таъкидлаб ўтилган.
“Чемпионат қатнашчилари, терма жамоалар, спортчи ва мураббийлар, ҳакамларни рўйхатдан ўтказиш IBА томонидан амалга оширилади. Мамлакатимиз мусобақани қабул қилиш ҳуқуқини қўлга киритган вақтда терма жамоалар ёки спортчиларнинг халқаро турнирлардаги иштироки бўйича бугунги чекловлар йўқ эди.
Ўзбекистон халқаро спорт нормаларига риоя қилувчи давлат бўлиб, спорт сиёсатдан ҳоли тамойилини қўллаб-қувватлайди”.
АҚШ, Швеция, Ирландия, Чехия ва Канада бокс федерациялари Ҳиндистон (аёллар ўртасида) ва Ўзбекистонда (эркаклар ўртасида) бўлиб ўтадиган бокс бўйича Жаҳон Чемпионатига бойкот эълон қилгани хабар қилинганди. Кейинчалик Украина ва Норвегия ҳам уларга қўшилган. Бунга сабаб сифатида федерациялар Россия ва Беларусь боксчиларига мусобақаларда ўз байроғи остида ҳаракат қилишга рухсат берилганини қайд этганди.
IBА бокс бўйича Жаҳон Чемпионати бойкот қилган федерациялар раҳбарларига нисбатан интизомий иш очгани аввалроқ маълум бўлганди.
Изоҳ (0)