“Barselona” to‘purari Levandovski Ispaniya Kubogi doirasidagi “El-Klasiko”ni o‘tkazib yuboradi

“Barselona” hujumchisi Robert Levandovski jarohat oldi.

Katalon klubi matbuot xizmati 34 yoshli futbolchining chap soni mushaklarida jarohat borligini ma’lum qildi. Dastlabki xulosalarga ko‘ra, polshalik forvard ikki hafta maydonga tusha olmaydi, deya xabar qilmoqda Relevo.

Shu tariqa Levandovski Ispaniya Kubogi yarim finali doirasida “Real”ga qarshi kechadigan 2-mart kungi o‘yinni o‘tkazib yuboradi. 19-mart kuni La Liga doirasida o‘tadigan “El-Klasiko”ga qadar tiklanishi mumkin.

Levandovski La Liga joriy mavsumida 20 ta o‘yin o‘tkazib, 15 ta gol va 5 ta golli uzatma muallifiga aylandi.

Yana kimlar jarohatda?

“Barselona” lazaretida yarim himoyachi Pedri va hujumchi Usmon Dembele bor. “Real”da esa himoyachilar David Alaba, Ferlan Mendi hamda hujumchi Rodrigoda jarohat mavjud.