Stranja—2023. Bahodir Jalolov va Shohjahon Abdullayevning raqiblari jangga chiqishni istamadi. Ikki o‘zbekistonlik oltin medalga ega chiqdi

Bolgariyaning Sofiya shahrida davom etayotgan boks bo‘yicha Stranja—2023 musobaqasining final bahslari 26-fevral, yakshanba kuni bo‘lib o‘tadi.

Boks federatsiyasi matbuot xizmatining ma’lum qilishicha, Bahodir Jalolov (+92 kg) va Shohjahon Abdullayevning (-86 kg) raqiblari ringga chiqishda bosh tortgan. Shu tariqa ikki o‘zbekistonlik muddatidan avval oltin medalga ega chiqdi.

Jalolov finalda armanistonlik Davit Chaloyanga qarshi, Abdullayev esa Vinchenso Litssiga (Italiya) qarshi jang qilishi kerak edi.

Qayd etish kerak, mazkur musobaqada qatorasiga uchinchi bokschi amaldagi Olimpiya va jahon chempioni Bahodir Jalolovga qarshi jang qilishdan bosh tortdi. Chorak finalda Qamshibek Kunkabayev (Qozog‘iston), yarim finalda esa Muhammad Abdullayev (Ozarbayjon) ringga chiqmagandi.

Bahodir Stranja—2023 musobaqasida bitta jang o‘tkazdi. U 1/8 finalda AQSH vakili Joshua Edvardsni yengdi.