Тошкент вилояти ИИБ Оҳангарон туманида номаълум аёллар болаларни ўғирламоқчи бўлгани айтилган хабарларга муносабат билдирди.
Ижтимоий тармоқларда Оҳангаронда бола ўғрилари ушлангани айтилган видео тарқалди. Қайд этилишича, мазкур ҳолат Тошкент вилояти ИИББ томонидан ўрганилган.
“Интернетда тарқатилган ушбу хабар, мазмунан ҳақиқатга тўғри келмайди”, — дейилади муносабатда.
Аниқланишича, 20 февраль куни 3 нафар аёл ҳашаротларга қарши дори воситаларини сотиш мақсадида Оҳангарон шаҳрига борган. Жараёнда уларнинг хатти-ҳаракатидан маҳаллий аҳоли шубҳаланиб (аёллар бола ўғирлашмоқчи изоҳи билан видеога олиб), ҳудудий ИИБга хабар берган.
ИИБ ходимлари томонидан ўтказилган суриштирув давомида аёлларнинг шахсига аниқлик киритилган (1985 йилда туғилган Д.Ш., М.К. ҳамда Д.Қ., Тошкент шаҳрида яшайди) ва уларнинг фаолиятини ўрганиш учун солиқ органи жалб қилинган.
ИИВ ахборот хизмати раҳбари Шоҳрух Ғиёсов 2022 йил октябрда ижтимоий тармоқларда тарқалган Тошкентда бола ўғирилари пайдо бўлгани ҳақида миш-мишларни рад этганди. Ўшанда у интернет орқали ёлғон маълумот тарқалишига сабабчи бўлаётган субъектларнинг ҳаракатларига ҳуқуқий баҳо берилишини билдирган.
Изоҳ (0)