Toshkentda bola o‘g‘rilari paydo bo‘lgani haqidagi xabarlar rad etildi

Ijtimoiy tarmoqlarda Toshkentda bola o‘g‘irilari paydo bo‘lgani haqida mish-mishlar tarqalmoqda. IIV axborot xizmati rahbari Shohrux G‘iyosov bu kabi xabarlar asossiz va haqiqatdan yiroqligini ma’lum qildi.

Tarqalgan ovozli xabarda Toshkentdagi 38-Orom maktabi yonida, Qorasaroy turar joy majmuasida, Qorasuvda va boshqa hududlarda bola o‘g‘irlashga urinishlar qayd etilgan. Xabarga ko‘ra, bir nechta bola dom-daraksiz yo‘qolgan. Ovozli xabar yo‘llaganlardan biri bu ishlarga deputatlar munosabat bildirmayotgani, mutasaddilar tomonidan tegishli choralar ko‘rilmayotgani haqida gapirgan.

Shohrux G‘iyosov internet orqali yolg‘on ma’lumot tarqalishiga sababchi bo‘layotgan subyektlarning harakatlariga huquqiy baho berilishini bildirdi.