Samarqandda bola o‘g‘rilari paydo bo‘lgani haqida tarqalgan xabarlar yuzasidan rasmiy ma’lumot berildi

Samarqand tumanida 25 yoshli ayol voyaga yetmagan qizning qulog‘idagi zirakni o‘g‘irlab ketgani aniqlandi, deb xabar beradi Samarqand viloyati IIB axborot xizmati.

Ijtimoiy tarmoqlarda Samarqand viloyatida bola o‘g‘rilari paydo bo‘lgani, ular qizaloqni oldiga kelib, uni aldab olib ketishgani to‘g‘risida xabarlar tarqaldi. Viloyat IIBga ko‘ra, noma’lum shaxs qizchani emas, uning qulog‘ida zirakni o‘g‘irlagan.

Ma’lum qilinishicha, 26-aprel kuni Samarqand tumani “Obod” mahallasida yashovchi fuqaro tuman IIBga ariza bilan murojaat qilib, 25-aprel kuni “Qo‘shko‘prik” mahallasi hududida 8 yoshli qizining voyaga yetmaganidan foydalanib, unga bildirmasdan qulog‘idagi tilla ziragini noma’lum shaxs o‘g‘irlab ketganini bildirgan.

Tuman IIB xodimlari tomonidan olib borilgan tezkor tadbirlar natijasida ushbu jinoyatni 25 yoshli Sabina M. sodir etgani aniqlanib, qo‘lga olingan.

Mazkur holat yuzasidan Samarqand tumani IIB huzuridagi tergov bo‘limi tomonidan Sabina M.ga nisbatan Jinoyat kodeksining 169-moddasi (o‘g‘rilik) 1-qismi bilan jinoyat ishi qo‘zg‘atilgan.

Shuningdek, Samarqand viloyati IIB ijtimoiy tarmoqlarda bola o‘g‘rilari paydo bo‘lgani, ular qizaloqni oldiga kelib, uni aldab olib ketishgani ostida tarqalgan xabarlarga munosabat bildirgan.

“Ayni damda tekshirib ko‘rilmagan, asossiz ma’lumotlarni tarqatib, vahima uyg‘otayotgan kimsalarning shaxslarini ham aniqlash bo‘yicha chora ko‘rilmoqda. Hurmatli fuqarolar, sizdan mish-mishlardan kelib chiqqan asossiz ma’lumotlarni tarqatmaslikni so‘raymiz. Vahima va mish-mishlar manbai bo‘lib qolmang”, — deyiladi munosabatda.

Avvalroq Toshkentda besh nafar bola o‘g‘irlangani to‘g‘risida tarqalgan xabarlar rad etilgandi.