DXX Qashqadaryo viloyati bo‘yicha boshqarmasi tomonidan viloyat IIB hamda Bosh prokuratura huzuridagi departament xodimlari bilan hamkorlikda bir nechta tezkor tadbirlar o‘tkazildi, deb xabar beradi O‘zA.

Jumladan, Koson tumanidagi fermer xo‘jaligi rahbari 49 yil muddatga ijaraga berilgan 50 gektar yer maydonini xaridor nomiga rasmiylashtirib berish evaziga 1,2 milliard so‘m talab qilib, oldindan 590 million so‘m olgan vaqtida ushlangan.

Kasbi tumanida o‘tkazilgan tadbirda esa fermer xo‘jaligi rahbari tanishi bilan birgalikda, mazkur xo‘jalikning paxta va g‘alla yetishtirishga mo‘ljallangan 35 gektar yer maydonini 1,2 milliard so‘mga sotishga kelishib, oldindan 380 million so‘m olgan vaqtida qo‘lga olgan.

Shuningdek, Kasbi tumanida qayd etilgan yana bir holatda fermer xo‘jaligi ish yurituvchisi mazkur xo‘jalik rahbarining ishonchini suiisteʼmol qilib, 14 gektar yer maydonini 130 million so‘mga sotgan vaqtida ushlandi. Ushbu yer maydonini rasmiylashtirib berishni va’da qilgan tuman Qishloq xo‘jaligi bo‘limi xodimi 5 million so‘m olganida ushlangan.

Bundan tashqari, Sirdaryoda yashovchi 43 yoshli  erkak fermer xo‘jaligi tashkil etishi uchun ajratilgan 4,5 gektar yer maydonini 30 ming dollarga sotishga kelishib, oldindan 20 ming dollar olgan vaqtida ushlangan.

Avvalroq Davlat xavfsizlik xizmati Andijon va Sirdaryoda yer maydonlari noqonuniy sotilishining oldini olgandi. Shuningdek, 2022-yil noyabrda Surxondaryo viloyatining Denov tumanida fermer xo‘jaligi raisi o‘zi rahbarlik qilayotgan fermer xo‘jaligiga tegishli bo‘lgan yerni sotmoqchi bo‘lganida qo‘lga tushgan edi.