“Ўзбекистонлик”: хорижда муваффақиятга эришган ватандошлар ҳақида ҳикоя қилувчи фильмнинг учинчи эпизоди тақдим этилади

Uzbekistan’s club креатив жамоаси баҳорда “Ўзбекистонлик” фильмининг учинчи эпизодини тақдим этади.

Одамларда келажакка ишонч, ўз устида ишлаш ва янги марраларни забт этишга мотивация уйғотувчи ушбу фильмнинг аввалги эпизодлари муваффақият қозонган ва кўпчиликка маъқул бўлган эди. Иккала эпизоднинг YouTube видеопорталида кўришлар сони миллиондан ошди. Томошабинлар изоҳларда фильм уларда илмга чанқоқликни, келажакка ишончни уйғотгани ҳақида ёзди.

Ўз олдига аниқ мақсад қўйиб, унга эришиш учун тўсиқларга қарамай, ҳаракат қилган юртдошларимизнинг ҳикоялари кўпчиликни илҳомлантирибгина қолмай, муваффақият ва мартабага эришиш йўлида имконсиз нарса йўқлигини ҳам кўрсатди.

Буни, жумладан, миллиардер Илон Маскнинг Tesla компаниясида фаолият юритаётган ва SpaceX билан ҳамкорликда ишлаётган иккинчи эпизод қаҳрамонлари ҳам исботлади. Ўшанда Uzbekistan’s club креатив жамоаси томонидан суратга олинган фильм кўплаб олқиш ва эътирофга сазовор бўлди. Аксарият томошабинлар бу каби илҳомлантирувчи ҳикоялар кўпроқ бўлиши керак, деган фикрни қўллаб-қувватлади.

Айнан шунинг учун тез орада, аниқроғи, баҳор фаслида учинчи эпизод экран юзини кўради. Унда томошабинлар Мадина Бердиева ва Азиз Шоҳакимов ҳикояси билан танишади.

Мадина Бердиева Қашқадарё вилоятида туғилиб, вояга етган, Қарши давлат университети хорижий тиллар ва бизнес-бошқаруви факультетларини тамомлаган, Бельгиядаги Антверпен менежмент мактабида IT-архитектура соҳасида магистр даражасини олган ҳамда Нидерландиядаги Delftа техника университетида ўқиган. Бугунги кунда Мадина жаҳоннинг энг йирик нефть-газ компанияларидан бири – Shell’да IT-архитектор сифатида фаолият юритмоқда. У ютуқ ва мағлубиятлардан иборат ҳаёт йўли, уни янги муваффақиятлар сари ҳаракатлантирган куч, яқинлар ва қариндошларнинг ишончи ҳамда бошқалар ҳақида сўзлаб беради.

Дунёнинг кўплаб мамлакатларида дирижёрлиги билан танилган, Страсбург филармоник оркестрининг мусиқий ва бадиий раҳбари Азиз Шоҳакимов эса 14 ёшида Алишер Навоий номидаги давлат опера ва балет театрида Жорж Бизенинг “Кармен” операсида дирижёрлик қилган ва Владимир Спиваков номидаги Халқаро хайрия фонди стипендиясига эга бўлган, 21 ёшда эса Малер номидаги нуфузли халқаро танлов совриндорига айланган. Ҳозирги кунда у Францияда яшаб, ижод қилмоқда.

“Ўзбекистонлик” фильмини суратга олишда Ёшлар ишлари агентлиги бошчилидаги ижодий жамоага Oriyent Group молиявий кўмак бермоқда. Uzbekistan Airways расмий авиаташувчи сифатида хизмат кўрсатмоқда. Ўзбекистоннинг Франциядаги элчихонаси ҳам турли ташкилий масалаларда ижодкорларга ёрдам кўрсатган.