O‘zbekistonda mehnatga layoqatli aholining bir million nafardan ortig‘i ishsiz qolmoqda. Bu haqda Kambag‘allikni qisqartirish va bandlik vaziri Behzod Musayev maʼlum qildi.
Xabarga ko‘ra, vazir “O‘zbekistonda ijtimoiy adolatni mustahkamlash maqsadida munosib mehnatni ilgari surish” mavzusidagi xalqaro konferensiyada hokim yordamchilari faoliyati yo‘lga qo‘yilishi natijasida 2 million 200 ming nafar ishsiz fuqaroning bandligi taʼminlanganini taʼkidlagan. Biroq bugungi kunda mehnatga layoqatli aholining 1,3 millioni ishsiz qolmoqda.
“Mamlakatimizda kambag‘allikni kamaytirish va bandlikni taʼminlash bo‘yicha mutlaqo yangi tizim – hokim yordamchilari instituti tashkil etildi. Hozirda respublikadagi mavjud mahallalarda 10 ming nafarga yaqin hokim yordamchilari faoliyat yuritib, ular tadbirkorlikni rivojlantirish bo‘yicha xizmat ko‘rsatmoqda. Hokim yordamchilari orqali subsidiyalar ajratish, ish bilan taʼminlash, kasbiy tayyorgarlikka jalb qilish va biznes yuritish ko‘nikmalari orqali qariyb 2,2 million kishining bandligi taʼminlandi”, deydi kambag‘allikni qisqartirish va bandlik vaziri Behzod Musayev.
Qayd etilishicha, ayni paytda respublika bo‘ylab faoliyat ko‘rsatayotgan 26 ta “Ishga marhamat” monomarkazi, 53 ta kasb-hunarga o‘qitish markazi, 539 ta kasb-hunar markazi, mahallalardagi o‘quv markazlari orqali mehnat bozorida talab katta bo‘lgan 70 dan ortiq kasb bo‘yicha ishsiz fuqarolarga taʼlim berilmoqda. Respublikada ishsizlik darajasi 8,9 foizga tushirilgan. Qashshoqlik darajasi ko‘rsatkichi 17 foizdan 14,1 foizga kamaygan. O‘zbekistonda qashshoqlik darajasini 12 foizgacha kamaytirish rejalashtirilgan.
Izoh (1)
унда 3 миллиондан ошик узбекистонлик россияда нима килиб юрибди