Прогнозлаштириш ва макроиқтисодий тадқиқотлар институти (ПМТИ) мутахассислари томонидан сўнгги йилларда Ўзбекистонда туризм соҳасида амалга оширилган ислоҳотлар ва уларнинг асосий натижалари ўрганилди.
2017—2022 йилларда Ўзбекистонга келган чет эллик сайёҳлар сони деярли 2 баробар ошди. Агар 2017 йилда уларнинг сони 2,7 миллион нафарни ташкил қилган бўлса, 2022 йилда бу кўрсаткич 5,2 миллион нафарга етди.
2022 йилда Ўзбекистонга сайёҳлар асосан Қозоғистон (1,6 млн киши, 2017 йилда 1,8 млн киши), Тожикистон (1,4 млн киши, 2017 йилдагига нисбатан 5,5 баробар кўп) ва Қирғизистондан (1,3 млн киши, 2017 йилдагига нисбатан 3,6 баробар кўп) келган.
Хорижлик сайёҳларнинг асосоий қисми, аниқроғи, 89,1фоизи Ўзбекистонга ўз қариндошларини йўқлаш мақсадида келган. Уларнинг аксарияти Қозоғистон (31,8 фоиз), Қирғизистон (29,2 фоиз) ва Тожикистон (27,9 фоиз) фуқароларидир.
Дам олиш ва ҳордиқ чиқариш мақсадида Ўзбекистонга энг кўп чет эллик фуқаролар Россия (37,6 фоиз), Қозоғистон (11,2 фоиз) ва Туркиядан (6,3 фоиз) келган.
Маълумот учун: дунёдаги 91 та мамлакат фуқаролари Ўзбекистонга келиш учун визасиз тартибдан фойдаланиши мумкин. Таққослайдиган бўлсак, Қозоғистонга 26 та, Туркияга 41 та, Грузияга эса 56 та мамлакат фуқаролари визасиз кела олади.
2022 йилда Ўзбекистонга келган сайёҳлар сони 2021 йилдагига нисбатан 3,4 миллион кишига кўп бўлди ва ўсиш 2,8 баробардан ҳам ортиқни ташкил этди.
Бунинг натижасида туризм хизматлари экспорти сезиларли даражада ошди. 2017 йилда туризм хизматлари экспорти 546,9 миллион долларни ташкил этган бўлса, 2022 йилда бу кўрсаткич 2,9 баробар ошиб, 1,6 миллиард долларни ташкил этди.
2017—2022 йилларда хизматлар экспортининг умумий ҳажмида туризм хизматлари экспортининг улуши 1,8 баробар ошди. Агар 2017 йилда бу кўрсаткич 22,1 фоизни ташкил этган бўлса, 2022 йилда 40,7 фоизга етди.
Туризм соҳасида амалга оширилган ислоҳотлар самараси соҳанинг салоҳияти катта эканлигидан далолат беради. Ўзбекистоннинг жаҳон миқёсида туристик жозибадорлигини ошириш учун туризмнинг этник ва экологик туризм каби янги йўналишларини ривожлантириш, шунингдек, мамлакатимизнинг турли ҳудудларида тематик фестивалларни ташкил қилиш таклиф этилмоқда.
Изоҳ (0)