Rossiya prezidenti Vladimir Putin Federal kengashga yo‘llagan murojaatida 2024-yilda bo‘lib o‘tadigan prezidentlik saylovlari, shuningdek, 2023-yil sentabr oyida o‘tkaziladigan gubernatorlik saylovlari va mintaqaviy qonunchilik assambleyalariga saylovlar “qat’iy qonun hujjatlariga muvofiq” o‘tkazilishini aytdi.
“Taʼkidlamoqchimanki, joriy yilning sentabr oyida mahalliy va mintaqaviy hokimiyat organlariga bo‘lib o‘tadigan saylovlar ham, 2024-yilgi prezidentlik saylovlari ham qonunga qatʼiy muvofiq, barcha demokratik konstitutsiyaviy tartib-qoidalarga rioya qilgan holda o‘tadi”, — dedi Putin.
Yanvar oyi boshida “Kommersant” manbalari Kremlning ichki siyosiy bloki 2024-yilgi prezidentlik saylovlariga ular belgilangan muddatda va amaldagi prezident ishtirokida o‘tkazilishidan kelib chiqib tayyorgarlik ko‘rishni boshlagani haqida xabar bergandi. Vladimir Putin yangi muddatga nomzodini qo‘yishi haqida hali ma’lum qilgani yo‘q. Meduza 2022-yil oktabr oyida Kreml prezidentlik kampaniyasiga tayyorgarlikni boshlaganini yozgandi. Rossiya prezidenti saylovi 2024-yil 17-martga belgilangan.
Prezident saylovidan avvalgi so‘nggi hududiy saylovlar 2023-yil sentabriga belgilangan, “Kommersant” manbasi aytishicha, u ancha ko‘p sonli hududlarni o‘z ichiga oladi. Demak, hududiy saylovlarda ham texnologik, ham mazmuniy g‘oyalarni sinab ko‘rib, so‘ng ularni 2024-yilda ham qo‘llash mumkin bo‘ladi. Bu yil kamida 20 ta hududda gubernatorlarning to‘g‘ridan to‘g‘ri saylovlari, 16 tasida esa qonunchilik majlislariga saylovlar bo‘lib o‘tishi kerak.
Izoh (0)