AQSH Davlat departamenti mamlakat rahbari Jo Baydenning Rossiya prezidenti Vladimir Putin bilan uchrashish shartini ma’lum qildi. Bu haqda BBC xabar berdi.
Departament matbuot kotibi Andrea Kaplan BBC’ga bergan intervyusida bu bo‘yicha gapirdi.
"Albatta, buning uchun Ukrainaga qarshi tajovuz tugashini ko‘rishimiz kerak. Ukrainada urush davom etayotganda bu darajada diplomatik muzokaralar olib borish juda qiyin”, — dedi rasmiy.
Kaplan prezident Bayden har qanday yetakchi bilan uchrashishga tayyorligini, ammo bu AQSH manfaatlariga mos kelishi kerakligini aytganini eslatdi. “Bu to‘liq diplomatik suhbat bo‘lishi kerak”, — dedi Kaplan va Baydenning hozirda Putin bilan uchrashish rejasi yo‘qligini qo‘shimcha qildi.
Shuningdek, rasmiy AQSH nafaqat Putin bilan, balki Rossiyaning boshqa vakillari bilan ham uchrashuv o‘tkazishga hozircha tayyor emasligini ta’kidladi.
“Rossiya Ukrainada urush olib borayotgan paytda buning iloji yo‘q. Bunday agressiyaga, Rossiya diplomatiyaga hali tayyor emasligiga guvoh ekanmiz, uchrashuvdan ma’no yo‘q”, — dedi Kaplan.
AQSH Davlat departamenti Ukraina urushni qanday tugatishi Kiyevning qarori bo‘lib, AQSH bunga ta’sir qila olmasligini ma’lum qildi.
Bayden va Putinning oxirgi uchrashuvi
2021-yil 16 iyun kuni Shveysariyaning Jeneva shahrida Bayden va Putin ishtirokida sammit bo‘lib o‘tgandi. Rahbarlarning uchrashuvi jami uch qismdan: tor doiradagi hamda ikkita kengaytirilgan tarkibdagi muzokaralardan iborat bo‘lgan. Prezidentlar deyarli 4 soat davom etgan suhbatda strategik barqarorlik, kiberxavfsizlik, inson huquqlari, Aleksey Navalniy ishi, Ukrainadagi vaziyat, savdo aloqalari va boshqa mavzularda suhbatlashgandi.
Izoh (0)