Rossiya safarbarlikning yangi to‘lqini doirasida universitetlarning kunduzgi bo‘limlari talabalarini ommaviy frontga yuborishga tayyorlanmoqda. Bu haqda Ukraina Mudofaa vazirligining Bosh razvedka boshqarmasi xabar berdi.
“Buning uchun ‘bildirish punktlari’ nomli markazlar yaratilmoqda, ular harbiy komissarliklarga kunduzi o‘qiydigan talabalarga chaqiruv qog‘ozlarini topshirishda yordam beradi”, — deyiladi Ukraina razvedkasi bayonotida.
Ushbu ma’lumotni tasdiqlash uchun ukrain razvedka boshqarmasi Tomsk davlat pedagogika universiteti rahbariyatiga tegishli bo‘lgan 9-fevraldagi buyruqning nusxasini e’lon qildi.
Hujjatda “bildirish punktlari”da ishlash uchun ma’lum miqdordagi talabalar va xodimlarni ajratish talabi ko‘rsatilgan. Qayd etilishicha, muayyan talabalar va xodimlar o‘z roziligisiz yoki hatto oldindan ogohlantirishsiz bunday punktlar tarkibiga kiritilmoqda.
Novosibirsk pedagogika universiteti va Tomsk politexnika universiteti xodimlari ham xuddi shunday buyruqlarni olgan, deyiladi Ukraina harbiy razvedkasi xabarida.
“E’tiborli tomoni, Rossiyadagi navbatdagi safarbarlik to‘lqini qo‘shimcha qonuniy asoslarni talab qilmaydi, chunki 2022-yil sentabr oyida e’lon qilingan qisman safarbarlik rasman yakunlanmagan. Safarbarlik 1-aprelgacha – bahorgi muddatli harbiy xizmatga chaqiruv boshlanishidan oldin amalga oshirilishi mumkin. Zarur bo‘lsa, ehtimol, chaqiruvning boshlanishi kechiktiriladi”, — deya qayd etilgan xabarda.
Rossiyada safarbarlik 2022-yil sentabr oyi oxirida boshlangan va Rossiya rasmiylariga ko‘ra, oktabr oyi oxirida tugagan. Biroq Vladimir Putin uni yakunlash to‘g‘risidagi farmonni hali imzolagani yo‘q. Yanvar oyida prezident matbuot kotibi Dmitriy Peskov farmonning baʼzi bandlari kuchda qolishini, chunki safarbarlik “boshqa chora-tadbirlarni ham o‘z ichiga olishini” aytdi.
“Qisman safarbarlik” chora-tadbirlari doirasida Putin universitet va kollejlarda kunduzgi yoki sirtqi bo‘limlarda o‘qiyotgan hamda birinchi marta ta’lim olayotgan talabalar uchun safarbarlikni kechiktirish to‘g‘risidagi farmonni imzolagandi. Shuningdek, ta’lim muassasalarining, jumladan, davlat akkreditatsiyasidan o‘tgan xususiy oliy o‘quv yurtlarining aspirantlari va kechki bo‘limlari talabalari safarbarlikdan ozod etilgan.
Izoh (0)