Россия президенти Владимир Путин Федерал кенгашга йўллаган мурожаатида 2024 йилда бўлиб ўтадиган президентлик сайловлари, шунингдек, 2023 йил сентябрь ойида ўтказиладиган губернаторлик сайловлари ва минтақавий қонунчилик ассамблеяларига сайловлар “қатъий қонун ҳужжатларига мувофиқ” ўтказилишини айтди.
“Таъкидламоқчиманки, жорий йилнинг сентябрь ойида маҳаллий ва минтақавий ҳокимият органларига бўлиб ўтадиган сайловлар ҳам, 2024 йилги президентлик сайловлари ҳам қонунга қатъий мувофиқ, барча демократик конституциявий тартиб-қоидаларга риоя қилган ҳолда ўтади”, — деди Путин.
Январь ойи бошида “Коммерсант” манбалари Кремлнинг ички сиёсий блоки 2024 йилги президентлик сайловларига улар белгиланган муддатда ва амалдаги президент иштирокида ўтказилишидан келиб чиқиб тайёргарлик кўришни бошлагани ҳақида хабар берганди. Владимир Путин янги муддатга номзодини қўйиши ҳақида ҳали маълум қилгани йўқ. Meduza 2022 йил октябрь ойида Кремл президентлик кампаниясига тайёргарликни бошлаганини ёзганди. Россия президенти сайлови 2024 йил 17 мартга белгиланган.
Президент сайловидан аввалги сўнгги ҳудудий сайловлар 2023 йил сентябрига белгиланган, “Коммерсант” манбаси айтишича, у анча кўп сонли ҳудудларни ўз ичига олади. Демак, ҳудудий сайловларда ҳам технологик, ҳам мазмуний ғояларни синаб кўриб, сўнг уларни 2024 йилда ҳам қўллаш мумкин бўлади. Бу йил камида 20 та ҳудудда губернаторларнинг тўғридан тўғри сайловлари, 16 тасида эса қонунчилик мажлисларига сайловлар бўлиб ўтиши керак.
Изоҳ (0)