Twitter’da avval reklamalar bo‘yicha yetakchi bo‘lib ishlagan sobiq xodim tarmoq egasi Ilon Maskning reklamaga oid postini tanqid qildi.
Mask o‘z postida Twitter lentasidagi “bezovta qiluvchi” reklamalar uchun foydalanuvchilardan uzr so‘ragan.
“Biz reklamalarni Google qidiruv tizimidagi kabi tvitlardagi kalit so‘zlar va mavzularga bog‘lash bo‘yicha tuzatishlar chorasini ko‘ryapmiz. Bu kontekstga aloqadorlikni sezilarli darajada yaxshilaydi”, — deyilgan uning tvitida.
Bunga sobiq xodim shunday javob qaytardi: “Twitter’dagi reklamalar bo‘yicha sobiq yetakchi sifatida ishonch bilan ayta olamanki, bu odam nima haqida gapirayotganini bilmaydi”.
Mask uning tanqidini javobsiz qoldirmadi: “Kechirasiz, siz daho bo‘lsangiz kerak, shuning uchun Twitter dunyodagi eng yomon reklama maydoni. Twitter’da deyarli hech kim hech narsa sotib olmaydi, lekin Instagram’da deyarli hamma sotib oladi. Bu tuzatilmoqda”.
Ma’lumot uchun, Ilon Mask Twitter’ni sotib olish bo‘yicha kelishuvni 27-oktabr kuni yakunlab, kompaniya uchun 44 milliard dollar to‘lagan.
Shundan so‘ng tadbirkor ijtimoiy tarmoq xodimlarining yarmiga yaqinini ishdan bo‘shatdi, qolganlarni esa yuqori intensivlik bilan ishlash kerakligi haqida ogohlantirdi.
OAV xabarlariga ko‘ra, ushbu voqealar fonida platforma faoliyatini saqlab qolish uchun muhim bo‘lgan ko‘plab xodimlar Twitter’ni tark etgan.
Xususan, CNBC Twitter Mask tomonidan sotib olinganidan so‘ng kompaniya xodimlarining qariyb 80 foizi ishdan bo‘shatilgani yoki o‘z xohishi bilan tark etgani haqida yozdi. Ma’lumotlarga ko‘ra, hozirda kompaniyaning to‘liq shtatdagi xodimlari soni qariyb 1,3 ming kishini tashkil etmoqda.
Izoh (0)