Janubiy koreyalik aktyor Li Jon Je “Kalmar o‘yini” serialining ikkinchi mavsumini suratga olish ishlari yaqinda boshlanishi haqida ma’lumot berdi. Uning so‘zlariga ko‘ra, 2023-yilning yozida serialning yangi mavsumini suratga olish jarayonlari boshlanadi.
.jpg)
“Suratga olish jarayonlari yozda boshlanadi va 10 oy davom etishi mumkin. Biz birinchi mavsumda ham 10 oy ishlagan edik, biroq bu pandemiya tufayli kechikishlarga sabab bo‘ldi. Ikkinchi mavsum yanada katta masshtabli bo‘lishini hisobga olsak, bu ham uzoq vaqtni talab etadi”, — deydi Li.
Katta ehtimol bilan, “Kalmar o‘yini” serialining davomi 2024-yilning kuzida tomoshabinlarga taqdim etiladi. Serialning birinchi mavsumi Netflix’da 2021-yilning sentabr oyida chiqqan edi va platformadagi barcha loyihalar orasida birinchi oydagi ko‘rishlar soni bo‘yicha rekord o‘rnatgandi. “Kalmar o‘yini” serialining birinchi mavsumi Netflix’da 1,65 milliard soat ko‘rilgan.
2022-yilning yozida rasman loyihaning ikkinchi mavsumi suratga olinishi ma’lum qilingan edi. Serialda bosh rolni ijro etgan aktyor Li Jon Je va loyiha rejissori Xvan Don-Xyok “Emmi” mukofotiga sazovor bo‘ldi.
Bunga parallel ravishda Netflix “Kalmar o‘yini” asosidagi realiti-shouni ishga tushirdi, unda g‘olib bo‘lgan inson 4,56 million dollar mukofot oladi (serialdagi o‘yinchilar soniga qarab). Hozirda suratga olish ishlari Buyuk Britaniyada olib borilmoqda.
Izoh (0)