Qozog‘iston Moliya vazirligi mamlakatda 2024-yildan boshlab ishga tushirilishi rejalashtirilgan Bolalar milliy jamg‘armasi loyihasi tafsilotlarini taqdim etdi. Bu haqda Forbes xabar bermoqda.
Ma’lum bo‘lishicha, Qozog‘iston fuqarolari tug‘ilganda dollarda omonat hisobvarag‘ini ochadi, undan tushgan mablag‘lar 18 yoshga to‘lgandan keyin uy-joy va ta’lim olish uchun ishlatilishi mumkin.
Sarmoyaviy daromadlar stavkasi Qozog‘iston Milliy jamg‘armasining bir necha yil davomidagi o‘rtacha rentabelligi darajasida belgilanadi, fuqarolarning hisobvaraqlaridagi jamg‘armalar miqdori esa taxminan 3 500 dollarni tashkil qiladi.
Hisobvaraqlarga mablag‘lar har yili 1-yanvardan boshlab milliy jamg‘arma mablag‘lari hisobidan kelib tushadi, bu mablag‘ xomashyo sektori hisobidan to‘ldiriladi. Bunday hisobvaraqlarni soliqdan ozod qilish rejalashtirilmoqda. Xuddi shunday model Norvegiya Davlat Pensiya jamg‘armasi tomonidan ham qo‘llaniladi.
Jamg‘arma hisobvarag‘idagi mablag'lardan 18 yoshdan keyin foydalanish mumkin. Ularni ta’limga, jumladan, xorijiy universitetlarda o‘qishga yoki uy-joy sotib olishga sarflash mumkin bo‘ladi, lekin faqat Qozog‘iston hududida.
18 yoshdan keyin to‘plangan mablag‘lar 5-10 yil davomida hisobvaraqlarda saqlanadi. Talab qilinmagan mablag‘lar pensiya hisobvarag‘iga o‘tkazilishi yoki meros qilib olinishi mumkin.
18 yoshga to‘lgunga qadar bola fuqaroligi o‘zgarsa va boshqa davlatga ko‘chib o‘tsa, ushbu huquqdan mahrum bo‘ladi. Fuqarolikni saqlab qolgan holda, u o‘zida qoladi.
Xorijiy ta’lim muassasasida o‘qish uchun to‘lovni amalga oshirish va jamg‘arma hisobvarag‘idan olingan mablag‘ga sotib olingan uy-joylarni qayta sotish uchun mablag‘lardan foydalanishni cheklash rejalashtirilmagan.
Izoh (0)