Қозоғистон Молия вазирлиги мамлакатда 2024 йилдан бошлаб ишга туширилиши режалаштирилган Болалар миллий жамғармаси лойиҳаси тафсилотларини тақдим этди. Бу ҳақда Forbes хабар бермоқда.
Маълум бўлишича, Қозоғистон фуқаролари туғилганда долларда омонат ҳисобварағини очади, ундан тушган маблағлар 18 ёшга тўлгандан кейин уй-жой ва таълим олиш учун ишлатилиши мумкин.
Сармоявий даромадлар ставкаси Қозоғистон Миллий жамғармасининг бир неча йил давомидаги ўртача рентабеллиги даражасида белгиланади, фуқароларнинг ҳисобварақларидаги жамғармалар миқдори эса тахминан 3 500 долларни ташкил қилади.
Ҳисобварақларга маблағлар ҳар йили 1 январдан бошлаб миллий жамғарма маблағлари ҳисобидан келиб тушади, бу маблағ хом ашё сектори ҳисобидан тўлдирилади. Бундай ҳисобварақларни солиқдан озод қилиш режалаштирилмоқда. Худди шундай модел Норвегия Давлат Пенсия жамғармаси томонидан ҳам қўлланилади.
Жамғарма ҳисобварағидаги маблағлардан 18 ёшдан кейин фойдаланиш мумкин. Уларни таълимга, жумладан, хорижий университетларда ўқишга ёки уй-жой сотиб олишга сарфлаш мумкин бўлади, лекин фақат Қозоғистон ҳудудида.
18 ёшдан кейин тўпланган маблағлар 5-10 йил давомида ҳисобварақларда сақланади. Талаб қилинмаган маблағлар пенсия ҳисобварағига ўтказилиши ёки мерос қилиб олиниши мумкин.
18 ёшга тўлгунга қадар бола фуқаролиги ўзгарса ва бошқа давлатга кўчиб ўца, ушбу ҳуқуқдан маҳрум бўлади. Фуқароликни сақлаб қолган ҳолда, у ўзида қолади.
Хорижий таълим муассасасида ўқиш учун тўловни амалга ошириш ва жамғарма ҳисобварағидан олинган маблағга сотиб олинган уй-жойларни қайта сотиш учун маблағлардан фойдаланишни чеклаш режалаштирилмаган.
Изоҳ (0)