Олий таълим, фан ва инновациялар вазири Иброҳим Абдураҳмонов ишга жойланмаган битирувчилари сони кўп бўлган ОТМ сифатсиз таълим бераётган муассаса деб топилиши ва келажакда уларнинг фаолиятини тугатиш масаласи кўриб чиқилиши мумкинлигини айтганди. Унинг ректор ва масъул проректорлари билан кенгайтирилган онлайн йиғилишда айтган бу гаплари турли муҳокамаларга сабаб бўлгач, вазирлик бу борада қўшимча тушунтириш берди.
“Вазир ректорларга таълим сифатини ошириш бўйича огоҳлантириш бераркан, бунда бир мақсад кўзланган — таълим сифатини ошириш. Яъни битирувчиларни меҳнат бозорида мавжуд иш ўринларига мос салоҳиятга эга кадрлар сифатида шакллантириш ОТМларнинг бош вазифаси бўлиши керак”, — дейилади баёнотда.
Вазирлик дунё тажрибасида 60 фоиз талабалар амалиёт ўтаган жойларида талабалик даврларидаёқ иш жойларини топиб бўлишини қайд этиб, Гарвард, Оксфорд, Кембриж каби хориждаги ОТМлар битирувчиларини иш билан таъминлаш бўйича энг илғорлиги, шу сабабли ҳам уларнинг нуфузи баланд эканини билдириб ўтган.
“Мисол қилиб келтирадиган бўлсак, таълим тизимига алоҳида эътибор қаратиб, юксак натижаларга эришаётган давлатлардан бири — Сингапур. Сингапурда олий таълимга мудофаа тизими даражасида эътибор берилиши диққатга сазовордир, яъни қатъий тартиб-интизом, назорат йўлга қўйилган. Сингапурда таълим сиёсати давлатнинг иқтисодий ва ижтимоий ривожланиши билан баравар юриши керак, деган тамойилга амал қилинади.
Яъни ҳар бир ОТМ битирувчиси иш жойига эга бўлиши шарт. ҚС рейтингига кўра дунёда 11-ўрин, Осиёда 1-ўринни эгаллаб келаётган Сингапур миллий университети раҳбарлари уларнинг бирорта битирувчиси ишсиз эмаслиги айтиб ўтилди. Университет битирувчиларининг ишга жойлаша олмаслиги бу олий ўқув юртининг нуфузи, шаъни ва қадриятларига путур етказади, деб ҳисобланади”, — дейилади вазирлик хабарида.
Таъкидланишича, ОТМлар иш ўрни мавжуд бўлмаган соҳаларда ўқиш ташкил этмайди. Таълим дастурлари мавжуд бўш иш ўринларни ҳисобга олган ҳолда ишлаб чиқилади. Ҳар бир университет ўз навбатида ишчи ўрин учун курашади. Бу таълимда рақобат муҳитини яратади.
“Шундан келиб чиқиб, мажлисда билдирилган фикр ОТМ раҳбариятининг талабаларни ишга жойлашга, ёшларнинг маълум бўш иш ўринларига тайёр кадр бўлиб етишишларига ёрдам беришга қаратилган. Бунда олий таълим муассасаси раҳбарларининг ОТМ битирувчиларини ўзгарувчан меҳнат бозорида иш билан таъминланишига янада масъулият билан қарашлари лозимлиги назарда тутилган
Олий таълим, фан ва инновациялар вазирлиги ўз тасарруфидаги ОТМлар раҳбарларига таълим сифатини ошириш бўйича топшириқ бериш ва таълим сифати паст бўлган ОТМларни огоҳлантириш ваколатига эга”, — дейилади Олий таълим, фан ва инновациялар вазирлиги хабарида.
Қайд этиш жоиз, вазирлик дастлаб эълон қилган хабарида битирувчилари сони кўп бўлган ОТМ сифатсиз таълим бераётган муассаса деб топилиши ва келажакда уларнинг фаолиятини тугатиш масаласи кўриб чиқилиши келтирилганди. Сўнг унга тузатиш киритилиб, огоҳлантиришда нодавлат ОТМ назарда тутилгани кўрсатилди.
Бироқ вазирликнинг юқоридаги муносабатида ўз тасарруфидаги ОТМга огоҳлантириш бериш ваколати борлиги ёзилган. Вазирлик тасарруфидаги олийгоҳлар эса давлат ОТМлари ҳисобланади.
Изоҳ (0)