Toshkent viloyati Qibray tumanida ikki yigit tengdoshlarini do‘pposlab, bezorilik jinoyatini sodir etdi. Bu haqda viloyat Ichki ishlar bosh boshqarmasi axborot xizmati xabar berdi.
Xabarga ko‘ra, holat 22-yanvar kuni sodir bo‘lgan. Shu kuni bir nechta nomaʼlum shaxslar 1998-yilda tug‘ilgan Sh.A. va 2003-yilda tug‘ilgan J.X.larni urib tan jarohati yetkazgan. Holat bo‘yicha aniqlik kiritish maqsadida tezkor surishtiruv olib borilgan.
Mazkur holat yuzasidan to‘plangan hujjatlarga asosan Qibray tumani IIB huzuridagi Tergov bo‘limi tomonidan Jinoyat kodeksining 277-moddasi 2-qismi “b” bandi bilan jinoyat ishi qo‘zg‘atilgan. Jinoyatni fosh etish borasida olib borilgan tezkor tadbirlar davomida ushbu jinoyatni 2000-yilda tug‘ilgan M.A. hamda X.Z.lar sodir etgani aniqlanib, Qibray tumani hududida navbatdagi bezorilik jinoyatini amalga oshirish maqsadida voqea joyiga kelgan vaqtida ushlangan.
Qayd etilishicha, hozirda jinoyat ishiga aloqador bo‘lgan jinoiy guruh aʼzolari hamda ularni boshqa jinoiy holatlarini aniqlashga qaratilgan tezkor surishtiruv tadbirlari hamda tergov harakatlari olib borilmoqda.
Izoh (0)