“O‘zgidromet” hafta davomida qanday ob-havo bo‘lishini ma’lum qildi

Ushbu hafta davomida O‘zbekistonda beqaror ob-havo bo‘lishi kutilmoqda, deb xabar berdi “O‘zgidromet”.

Qayd etilishicha, respublika hududida bo‘yicha vaqti-vaqti bilan asosan yomg‘ir ko‘rinishidagi yog‘ingarchilik bo‘ladi. Tog‘oldi va tog‘li hududlarda yog‘ingarchilik, 16—17-fevralda ba’zi joylarda kuchli yomg‘ir va qor ko‘rinishidagi yog‘ingarchilik bo‘ladi.

14—16-fevralda respublikaning ayrim hududlarida shamol tezligi 15-20 metr/sekundgacha kuchayishi kutilmoqda. Ba’zi joylarga tuman tushishi mumkin.

Ushbu haftaning harorat foni fevral oyining o‘rtasi uchun bo‘lgan iqlimiy me’yorga yaqin bo‘ladi. Kechalari havo harorati 0-5 daraja iliq, kunduz kunlari asosan 6-11 daraja iliq atrofida bo‘ladi. Respublika shimolida haftaning birinchi yarmida kechalari 5-10 daraja sovuq, kunduz kunlari 0-5 daraja iliq, ikkinchi yarmida esa kechalari 2-7 daraja sovuq, kunduz kunlari 2-7 daraja iliq bo‘ladi.

Toshkentda 13-fevral kuni yog‘ingarchilik kutilmaydi, 14—15 va 17-fevralda vaqti-vaqti bilan biroz yomg‘ir yog‘adi, 16-fevralda yomg‘ir yog‘adi. Havo harorati kechalari 0-3 daraja iliq, kunduz kunlari 7-10 daraja iliq atrofida bo‘ladi.

Kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfi e‘lon qilindi.