Ijtimoiy tarmoqlarda Samarqand viloyatining Payariq tumanidagi Chelak shifoxonasida bosh shifokorning o‘g‘li va kelini hamshiralarni kaltaklagani aytilgan videolavha tarqaldi. Sog‘liqni saqlash vazirligi voqeaga aniqlik kiritdi.
Ma’lum qilinishicha, 2-fevral kuni soat taxminan 15:30 larda Samarqand viloyati Payariq tuman tibbiyot birlashmasiga qarashli Chelak 1-son shifoxonasining o‘rta tibbiyot xodimlari — A.N. va B.Sh. o‘rtasida o‘zaro davom etib kelayotgan oilaviy kelishmovchilik sabab janjal yuzaga kelgan.
Buning natijasida hamshira B.Sh. va uning onasi, kichik tibbiy xodim M.D. jiddiy tan jarohati olgan. Shundan so‘ng jabrlangan har ikki bemorga zudlik bilan birinchi tibbiy yordam ko‘rsatilib, shu kuni mazkur shifoxonaning shoshilinch jarrohlik bo‘limiga yotqizilgan.
Viloyat IIB matbuot xizmatining ma’lum qilishicha, A.N. ularni stol ustida turgan choynak bilan urgan.
Tekshiruvlar natijasida hamshira B.Sh.ga burun suyagi yopiq sinishi, burun usti sohasi urilib, kesilgan jarohati, bosh miya chayqalishi, kichik tibbiy xodim M.D.ga esa burun usti, chap yonoq sohasi, chap ko‘z ichki burchagi urilib, kesilgan jarohati, bosh miya chayqalishi tashxisi qo‘yilgan.
Bemorlarga belgilangan standartlar asosida tibbiy muolajalar ko‘rsatilgach, 11-fevral kuni qoniqarli ahvolda uyiga ruxsat berilgan.
Ayni paytda o‘z hamkasblariga tan jarohati yetkazishda gumonlanayotgan fuqaro A.N.ga nisbatan ichki ishlar organlari tomonidan Jinoyat kodeksining 109-moddasi (qasddan badanga yengil shikast yetkazish) 2-qismi bilan jinoyat ishi qo‘zg‘atilib, tergov-surishtiruv harakatlari olib borilmoqda.
“O‘z navbatida, vazirlik tomonidan ushbu voqea bo‘yicha o‘tkazilgan o‘rganishlar yakunida bunday salbiy holatning yuzaga kelishiga eʼtiborsiz bo‘lgan hamda muassasa xodimlari o‘rtasida kasb etikasi va majburiyatlariga rioya etish yuzasidan yetarlicha tushuntirish olib bormagan bir qator masʼullarga nisbatan qonunda belgilangan tartibda tegishli jazo choralari qo‘llanildi”, — deyiladi vazirlik xabarida.
Izoh (0)