Oliy Majlis Qonunchilik palatasining Mehnat va ijtimoiy masalalar qo‘mitasi raisi Mavluda Xo‘jayeva Toshkentda nogironligi ko‘rinib turgan bemorlarni sarson qilmay ularni nogironlik guruhlariga chiqarish amaliyoti joriy qilinganini aytmoqda. Bu haqda u Toshkent shahrining Yashnobod tumanida joylashgan “Ishga marhamat” mono-markazida bo‘lib o‘tgan davra suhbatida maʼlum qildi.
Kecha, 2023-yilning 10-fevral kuni Toshkent shahrining Yashnobod tumanida joylashgan “Ishga marhamat” mono-markazida Oliy Majlis Qonunchilik palatasi deputatlari, Kambag‘allikni qisqartirish va bandlik vazirligi, shuningdek vazirlik huzuridagi tashkilotlar faollari, jamoatchilik vakillari bilan davra suhyuati bo‘lib o‘tdi.
Seminarda deputatlar va vazirlik masʼullari aholini ijtimoiy himoya qilish tizimini takomillashtirish maqsadida amalga oshirilayotgan ishlar haqida gapirdi.
“Bugun aynan Toshkent shahrida nogironligi ko‘rinib turgan bemorlarni ovoragarchiliksiz, uyida yotgan holatida ham elektron hujjatlar yordamida nogironlik guruhiga chiqarish amaliyoti yo‘lga qo‘yilgan. Buning barcha huquqiy asoslari yaratilgan. Faqat ishlash mexanizimidagi kamchiliklarini birin-ketin bartaraf etishimiz lozim bo‘ladi”, — dedi Oliy Majlis Qonunchilik palatasining Mehnat va ijtimoiy masalalar qo‘mitasi raisi Mavluda Xo‘jayeva.
Taʼkidlanishicha, O‘zbekistonda aholini ijtimoiy himoya qilish strategiyasida kam taʼminlangan oilalarni ijtimoiy yordam dasturi bilan qamrab olish darajasi 58,8 foizdan 98,1 foizga yetkazish, kambag‘allik darajasini 17 foizdan 5 foizga qisqartirish, aholining mehnat bozorida ko‘rsatiladigan xizmatlar bilan qamrab olinganligini 64,2 foizdan 70 foizga oshirish, ishsizlik nafaqasini oluvchi ishsizlar ulushi 5,7 foizdan 7 foizga oshirish kabi ijtimoiy himoya sohasiga taaluqli 10 ta maqsadli ko‘rsatkichlari belgilangan.
“Mazkur maqsadlarni hayotga tadbiq etish borasida 2022-yilda ham ko‘plab muhim ustuvor vazifalar amalga oshirildi. Kambag‘allik darajasi 2022-yildagi 17 foizdan 2023-yil 1-yanvar holatiga ko‘ra, 14,1 foizga tushishiga erishilganligi ushbu vazifalarning yorqin misolidir. 2022-yilda ‘Ijtimoiy himoya yagona reyestr‘iga 2,3 million oila kiritilgan bo‘lib, 2,2 million kam taʼminlangan oilalarga bolalar nafaqasi hamda 74,8 ming kam taʼminlangan oilalarga moddiy yordamlar sifatida jami 11,4 trillion so‘m mablag‘lar to‘lab berilgan” — deydi davra suhbatida so‘z olgan masʼullar.
Qo‘shimcha qilinishicha, 2022-yilda fuqarolarni kasb-hunarga o‘qitish ko‘lamini kengaytirish maqsadida “Ishga marhamat” monomarkazlari soni 23 taga, mahalla kasb-hunarga o‘qitish maskanlari soni 489 taga yetkazilgan. Mazkur taʼlim muassasalarida 140 ming ishsizlar kasb-hunarga o‘qitilgan. Imkoniyati cheklangan shaxslarni bandligini taʼminlash maqsadida alohida Milliy dastur ishlab chiqilib, 15 ming nogironligi bo‘lgan fuqarolarning bandligiga ko‘maklashilgan.
Izoh (0)