Turkiyada 1 600 dan ortiq odamning hayotiga zomin bo‘lgan zilzila munosabati bilan 12-fevralga qadar mamlakat bo‘ylab motam e’lon qilindi. Tegishli farmonni prezident Rajab Toyyib Erdo‘g‘on imzoladi.
“2023-yil 6-fevral kuni mamlakatimizda yuz bergan zilzila munosabati bilan yetti kunlik umummilliy motam e’lon qilindi. Bayrog‘imiz 2023-yil 12-fevral, yakshanba kuni quyosh botgunga qadar barcha milliy va xorijiy vakolatxonalarimizda tushiriladi”, — deb yozdi Erdo‘g‘on Twitter sahifasida.
7,8 magnitudali zilzila episentri Turkiyaning bir milliondan ortiq aholisi bo‘lgan Gaziantep shahridan 37 kilometr uzoqlikda joylashgan. So‘nggi ma’lumotlarga ko‘ra, Turkiyada zilzila qurbonlari soni 1 651 nafarga yetdi, jarohatlanganlar soni 11 119 nafarni tashkil qilmoqda. Kataklizm katta vayronagarchiliklarga sabab bo‘ldi, silkinishlar Turkiyaga qo‘shni mamlakatlarda ham sezildi.
Suriya ham yer silkinishi oqibatida 538 kishi halok bo‘ldi, 1 353 kishi jarohat oldi. Suriya bosh vaziri Husayn Arnusning singlisi Nasub Arnus 6-fevral kuni Xama shahrida zilzila paytida bino qulashi oqibatida vafot etdi.
Mavzuga doir: Turkiyadagi zilzila ortidan yana 6 ta davlatda yer qimirlashi yuz berdi (video)
Izoh (0)