“Andarxon” — Farg‘ona viloyatining Beshariq tumanida joylashgan mahalla bo‘lib, mazkur mahalla fuqarolar yig‘inida 850 dan ziyod xonadon mavjud. Mazkur hududda yashovchi aholi vakillari poliz mahsulotlari yetishtirish bilan shug‘ullanadi. Andarxonliklar yetishtirgan qovun bir yillab saqlanadi. “Daryo” muxbiri tilimi tilni yorar qovunlarning uzoq saqlanish sirlari bilan qiziqdi.
Mahalla aholisining aksariyati qovun, tarvuz va boshqa poliz mahsulotlari yetishtirish bilan shug‘ullanadi. Ular, asosan, Jizzax va Sirdaryo viloyatlarida dehqonchilik qiladi.
Andarxonliklar yetishtirgan qovunlar shirin va xushtaʼmligi bilan nafaqat Farg‘ona vodiysida, balki O‘zbekistonning barcha viloyatlarida dong taratgan.
Andarxon qovunlari qo‘shni Tojikiston, Qozog‘iston, Qirg‘iziston va Rossiyaga ham yetkazib beriladi. Andarxonlik mirishkorlar qovun yetishtirish orqali gektaridan o‘rtacha 20-30 million so‘m daromad oladi.
Andarxonliklar qadimdan qovun saqlash sirlarini ham yaxshi o‘zlashtirgan. Xonadonlardagi maxsus joylarda qovunlar hatto may oyigacha saqlanadi.
Qishloqdagi Sharipovlar oilasi ham qovun yetishtirish va saqlash hadisini olgan. Xonadon vakillari bir yilda 1 gektar yerdan sarf-harajatlardan tashqari 20 million so‘mdan ortiq daromad ko‘taradi.
Aprel–may oylarida ekilgan qovunlar sentabr–oktabr oylarida uzib olinadi. Katta-kichikligiga qarab saralangan qovunlar qovg‘a bilan bog‘lanadi. Shundan so‘ng maxsus omborxonalarga oktabr oyida terib qo‘yilgan qovunlar keyingi yilning may oyigacha tabiiy holda saqlanadi.
Qovun saqlash uchun mo‘ljallangan omborxonalarning tomi va devorlarida kichik tuynuklar qoldiriladi. Bu tuynuklar omborxonada havoni moʻtadil ushlab turishga va qovunlarni uzoq vaqt saqlashga yordam beradi.
Qovunlarni uzoq vaqt saqlashda qishloq hududining geografik joylashuvi ham muhim ahamiyatga ega. Hududning o‘ziga xos shamoli bo‘rikalla, qirqma, umrboqiy, kampirto‘n kabi qovun navlarini palakdan yangi uzilgandek saqlash imkonini beradi.
Izoh (0)