“Geosiyosiy vaziyatning salbiy taʼsiri sababli inflyatsiya darajasi kutganimizdan yuqori shakllandi” — Mamarizo Nurmurodov
Oʻzbekistonda 2022-yil davomida inflyatsiya kutilgan yillik 8-9 foiz emas, 12,3 foiz darajasida shakllandi. Bu haqda Markaziy bank raisi Mamarizo Nurmurodov jurnalistlar bilan oʻtkazilgan matbuot anjumanida maʼlum qildi, deya xabar berdi “Daryo” muxbiri.
Mamarizo Nurmurodovning aytishicha, geosiyosiy vaziyatning keskinlashuvi Oʻzbekistonda inflyatsiya darajasining oʻsishi va iqtisodiy faollikning sekinlashishiga sabab boʻlgan.
“2022-yilda inflyatsiyani 8-9 foizga pasayishini kutgandik, lekin tashqi geosiyosiy vaziyatning tovarlar, xomashyo mahsulotlariga taʼsiri va buning oqibatida asosiy turdagi oziq-ovqat mahsulotlari, energiya resurslari narxlarining yuqori surʼatlarda oʻsishi hisobiga inflyatsiya darajasi biz kutgandan yuqori shakllandi. 2022-yil yakuni boʻyicha yillik inflyatsiya 12,3 foizga teng boʻldi.
Soʻnggi yarim yillikda bazaviy inflyatsiyada ham sezilarli oʻsish tendensiyasi kuzatilyapti. Bu oʻsish yil yakuni boʻyicha 13,8 foiz darajasiga yetdi. Bazaviy inflyatsiya darajasining yuqori boʻlishi, iqtisodiyotda shakllanayotgan inflyatsion jarayonlarni, keng qamrovli va uzoq muddatli xarakterga ega boʻlib borayotganini bildiradi. Bu oʻz oʻzidan monetar siyosatimizda maʼlum bir toʻgʻrilashlarni kiritishni taqozo etadi”, — dedi Markaziy bank rahbari.
Mamarizo Nurmurodovning ta’kidlashicha, joriy yilda aksariyat rivojlangan davlatlarda ham iqtisodiy oʻsish sekinlashishi prognoz qilinmoqda.
“2023-yilda global iqtisodiy faollik va asosiy savdo hamkorlarimiz boʻlgan davlatlar iqtisodiyotining oʻsishida pasayish bilan bogʻliq yuqori noaniqliklar saqlanib qolmoqda. Bu kutayotgan iqtisodiy koʻrsatkichlarimiz shakllanishiga ham maʼlum jihatdan salbiy taʼsir koʻrsatishi mumkin.
Bundan tashqari, xalqaro moliya institutlari rivojlangan davlatlarning koʻpchiligida retsessiya holati kuzatilishini, ularda 2023-yildagi iqtisodiy oʻqish darajasi 0,5 foiz miqdorida shakllanishini yoki boʻlmasa, rivojlanayotgan davlatlarda oldingiga qaraganda oʻsish darajasi pasayishi kutilayotgani, yaʼni 2022-yil darajasida shakllanishi borasida oʻzining qarashlarini ifoda qilgan. Global iqtisodiy faollikdagi maʼlum pessimik elementlar bizning ham iqtisodiy faolligimizga oʻz taʼsirini koʻrsatmasdan qolmaydi”, — dedi u.
Avvalroq Mamarizo Nurmurodov respublikada oziq-ovqat narxlari oʻsishi bilan bogʻliq inflyatsion xatarlar qisqa muddatli xarakterga ega ekanini aytgandi.
Mavzuga doir:
Shox Alidjanov
karrupsiya