O‘zbekistonda jinoyatchilikka qarshi kurashda ishtirok etib, jarohat olgan fuqarolarga pul beriladi

Vazirlar Mahkamasi qarori bilan huquqbuzarliklar profilaktikasida ishtirok etuvchi fuqarolarning ijtimoiy ta’minoti bo‘yicha choralar belgilandi.

Hujjatga muvofiq, jamoat xavfsizligini ta’minlash, huquqbuzarliklar profilaktikasi va jinoyatchilikka qarshi kurashishdagi faol ishtirok etgan va o‘rtacha yoki og‘ir tan jarohati olgan yoxud halok bo‘lgan shaxslarga bir martalik nafaqa tayinlanadi.

Bir martalik nafaqa miqdorlari quyidagicha:

• o‘rtacha tan jarohatida — BHMning 20 baravari;
• og‘ir tan jarohatida — BHMning 50 baravari;
• fuqaro halok bo‘lganida — BHMning 100 baravari.

Nafaqalar tayinlashga profilaktika organlarining sud-tibbiy xulosa yoki o‘lim haqidagi guvohnoma ilova qilingan taqdimnomasiga asoslangan komissiya qarori asos hisoblanadi. Hujjat Qonunchilik hujjatlari milliy bazasida e’lon qilingan va 30-yanvardan kuchga kirgan.